Dee Kluft tweschen Russlauntdietsche en Hiesje

Plautdietsch FRIND befrajcht fierende mennische Tjapp

 Autor: Horst Martens

Dee Iesana Veahang ess aul ver meist 30 Joah jefolle. Dee Jeschwista utem Ooste kunne endlich dee sibirische Tjill hinja sich lote en noh ons noh Dietsch­launt kome. Uck een poa Mures wor­de derch­jebroake, oba eene Waunt besteiht bit vendoagschen Dach – en daut soogoa meddel enn Dietsch­launt: dee tweschen dee plautdietsche russlauntdietsche Menniste en dee hiesje hochdietsche Menniste.

Tweschen dee beid Gruppe harrscht Funk­stille, Iestied, doa rannt nuscht, aus bie eenem Eehepoa, daut nich Desch en Bad deelt, sonda jetrannt lewt. Doabie freide sich enne 70-ja Joahre dee eene oppe aundre. Von disse Freid ess leida nuscht jeblewe.

Prinzipie ewa Bord jeschmete

Dee eene tetjne sich derch Profilloosichtjeit ut en hechle hinjerem Tiedjeist hea, dee aundre sent soo aundasch, daut maun met ahn nuscht to doone hawe well. Dee eene hawe dee mennische Prinzipie ewa Bord jeschmete, dee aundre finje emma meeha Prinzipie, omm sich auftojrenze. Dee Plautdietsch FRIND wull weete, woo daut Probleem vonne kloke Tjapp manke Menniste jeseehne woat. Eene lange List von Persoone word toopjestallt en per Mail toojestallt. Dee Rücklauf we tofredenstallend: Goot 60 Prozent vonne Aunjeschrewne auntwode. En dee Aufsaje were uck typisch: Dee Hiesje dochte sich Utrede ut („Etj tjann dem Plautdietsch Frind nich”), dee Russlauntdietsche vesproke frindlich, eene Auntwot to schetje, malde sich oba nie. Na jo, dee meschte hawe sich dann oba wertjlich Jedanke jemoakt. Velmol Dankscheen!

Vel Veaschlej vonne Befroagde

Omm dee Kluft to ewabridje, kaun maun vel doone. Vonne Befroagde sent uck eene Rej von Meajlichtjeite jenannt worde. Eenen wiedren Veaschlag well etj moake: Wooromm jefft maun nich eene Tiedschreft fe aulle dietschsproakje Mennonite rut? Daut, waut bit nu aun Tiedschrefte besteiht, ess seeha theologisch en seeha blootoarm jestaultet. Tjitj wie ons doch mol dee Mennonitische Post aun: Dee Publikatioon es vom Mennonite Central Committee jeschauffe worde, omm dee konservative Mennonite metteenaunda to vebinje.

Eene Tiedschreft fe aule dietschsproakje Menniste?
En dee „Post” woat jelest, aus tjeene aundre Tiedschreft oppe Welt, waut uck doaraun licht, daut dee Konservative sest nuscht tom lese hawe – buta dee Bibel – en Facebook en Co. auflehne. Mien Veaschlach ess, eene Tiedschreft to schauffe, dee bie dee Mensche auntjemmt, eene Mischung tweschen Chrismon en Bunte, tweschen „Mennonitische Post” en Jele Post. Mett interessaunte Reportagen ewa Menniste oppe gaunze Welt, mett interessaunte Diskussioone ewa jeistije Aunsechte, mett Nieichtjeite utem sozialen Bereich. Met grootformatje Fotos. Opp Hochdietsch, mett veea Sied opp Plautdietsch enne Medd.

ONSE FROAGE
1. Sennt See uck dee Meeninj en waut hoole See doavon, daut dee hiesje en dee plautdietsche Mennonite meist nuscht nich metteenaunda to doone habe?
2. Waut sent dee (historische) Jrind doafea, daut dee beid Gruppe sich uteneen jelewt habe?
3. Woont sent dee bekaunde Stereotype von dee watjselsiedich aundre Lewensform?
4. Sull wie disse Paralleliteet ewawinde oda sulle aula enn eahrem Biotoop wiedableje (oda vedreje?), ohne daut sich eena omm dem aundren tjemmat?
5. Habe See perseenlich eeha goode ooda schlajchte Erfoahrinje jemoakt?

Dee Auntwode:

Heinrich Siemens: „Hiesje schloge dee Tjoatjedea too“

Dieter Goetz Lichdi: „Daut ess een Skandal!“

Johannes Reimer: mennische Parallelwelt woat eahre Tjinja veliere

Gary Waltner: „Komplette Integration selden meajlich“

Hans-Jürgen Goertz: mettenaunda unjahoole

Hans von Niessen: wann tjeene Vefoljung drooht …

Liesa Unger: ewerem Tallaraunt tjitje

Edwin Boschmann: Plautdietsche send opprajchte Frind

Astrid von Schlachta: een Biotoop, daut funktioniet

Kurt Kerber: Se sochte eahre Oat von Aundachte