Delegation vonne „Frind“ foaht too dee Plautdietsche Medienkonferenz

KofferEnn een poa Doag es daut soowiet: Dann stieje een poa Vetreda vonne „Plautdietsch Freunde“ em Fleja Rechtung Paraguay. Enne Kolonie Neuland startet aum Mondach, 30. Aprell, dee veejadochsche Plautdietsche Medienkonferenz. Daut Programm kaun maun unje emm Tatjst downloade.

Dee Reis emm Nohme vonn „Plautdietsch Freunde“ trede aun: dee Veasettenda Heinrich Siemens, Viktor Sawatzki, dee de Konferenz mett organisiet haft, Horst Martens aus Redaktionsleita vom „Plautdietsch Frind“ en Franz Thiessen, langjoahschet Vereins- en Veastaundsmettjlied. Aus Informatioon fe aula, dee aum Flughoowe enne paraguayische Hauptstaudt Asunción wachte: Jiedra flicht mett eenem aundren Flug. Wundat junt nich, wann nich aula toop utem Fleja stieje. Viktor Sawawtzki tjemmt sogoa ut Bolivien aunjereist. En Franz Thiessen brinjt mett Willi Tissen en siene Fru niejet Frindschaft mett noh Paraguay.

2PMK-ProgrammEwa 70 mennische Medienvetreda ut Süd-, Meddel- en Noodamerika en Dietschlaunt hawe sich aunjesajcht. Oba nich moa doaraun ertjannt maun, daut dee Konferenz seeja wichtich jenohme woat. Maun mott sich moa daut Programm auntjitje, daut dee Organisatore toopjestallt hawe. Von Mondach bett Donnadach vollet Programm. Klock sewen – aulso too nachtschloopenda Tied – fange dee Sitzunge aun. Dee Veaunstaltunge ranne bett lot zeowens, dee Birjastiej woare escht gaunz tom Schluss hochjeklauppt. Aum Mondach heet ons dee Ewaschult ut Neuland wellkome – dee heet Heinz Bartel en ess ver Kortem escht  jewählt worde. Mettorganisatorin Michaela Bergen hellt eenen Vortrag mett dem Titel „Toop meeha erretje – Wie können wir besser zusammen arbeiten?“. Dann woad aules en Oabeitsgruppe ennjedeelt. Daut jefft enne neachste Runde noch meeja Veadrog: „Vorstellung der Medienplattform ‚PlautPot‘ (Viktor Sawatzki), „Die Plautdietsche Sprache – ist ein offizielles Wörterbuch möglich“ (Heinrich Siemens), „Wie funktioniert ein Radio?“ (Hans Reimer), „Das Mennonitenbild in der Öffentlichkeit“ (Horst Martens). Aule Programmdeele vebinjt aus Moderator Osvaldo Schapansky, dee uck to dee Organisatore jehiet. Daut komplette Programm aus Download: 2. Plautdietsche Medienkonferenz / Programm.

Noo sooveel Theorie freie sich dee Deelnehma aul oppe Tererépaus, denn dee es uck foaken ennjeplont.

Butadem jefft daut aum Owend Veaunstaltunge, to dee aula utem Chaco ennjelodt send. Uwe Friesen leit eenen Literaturowend. Aun eenem Owend woare mennonitische Witze veajestallt (Heinz Wiebe). Dee Grupp „Fief Menniste“, em Chaco weltberühmt, sinjt aun dissem Owend.

Dee „Plautdietsch Frind“ woat ewa dee Konferenz ommfangreich berechte. Dee Utgow erschient emm Juli 2015. Vleicht es daut uck meajlich, vonne Konferenz ut too blogge, oba daut henjt doavon auf, woo dee Kommunikationsvehältnisse en Neuland send.

2. Plautdietsche Medienkonferenz / Programm

Autor: Horst Martens

 

 

Leave a Comment

UA-51537283-2