Ommfroag: Dee Kluft tweschen Plautdietsche en Hochdietsche
1. Sennt See uck dee Meeninj en waut hoole See doavon, daut dee hiesje en dee plautdietsche Mennonite meist nuscht nich metteenaunda to doone habe?
Daut ess schod, daut it soo weinich Kontakte tweschen hiesje en plautdietsche Mennonite jefft. Etj hab goode Kontakte ewa dee Jrenze wajch, bemoatj oba, daut daut vele Mensche schwoa fellt, ewa disse Jrenz to klunje. Daut ess omm soo trurija, auss wie je demselwjen Gloowe habe.
2. Waut sent dee (historische) Jrind doafea, daut dee beid Gruppe sich uteneen jelewt habe?
Doa sent foaken kulturelle en Mentaliteetsjrenze. Dee Jedanke sent von veschiedne Lenda jepreajt. Humor, Ironie en soo waut ess gaunz aundasch aus hia enn Dietschlaunt. En wiels daut je foaken omm Mensche jeiht, dee goot Hochdietsch rede tjene, sull eene meist nich meene, daut dee Dentjstrukture soo unjascheedlich sent. Dann ess daut foaken leichta sich tridg to tratje en unja sich to bliewe.
3. Woont sent dee bekaunde Stereotype von dee watjselsiedich aundre Lewensform?
Jeajenewa dee Plautdietsche: Dee sent koomisch, dee pausse nich gaunz doatoo, dee sent ooltmoodsch, see sent nich mette Tiet jegohne, see sent von jistre.
Jeajenewa dee Hochdietsche: Dee sent stolt, dee sent distanziat, see habe sich kulturell too seeha aunjepausst, dee welle soowesoo nuscht nich mett ons to doone habe.
4. Sull wie disse Paralleliteet ewawinde oda sulle aula enn eahrem Biotoop wiedableje (oda vedreje?), ohne daut sich eena omm dem aundren tjemmat?
Optimal wudd eene goode Integratioon senne. Daut wudd schod en trurich senne, wann dee plautdietsche Kultua opphiere wudd to existiere. Doamett jeiht waut fe emma veloare. Etj sie ewa jieden Mensch frooh en dankboa, dee opp disse Froag vemeddle kaun. Soone Mensche jefft daut oba nich vele.
5. Habe See perseenlich eeha goode ooda schlajchte Erfoahrinje jemoakt?
Etj hab seeha goode Frind opp beide Siede. Wann eena maunchmol entteischt woat, dann jehiet uck daut tom Lewe. Daut tjemmt uck vea. Oba nich meeha oda weinja aus sest em Lewe. Miene plautdietsche Frind sent oba seeha opprechtje Frind. Daut tjemmt von Hoate. Wann eena disse Mensche escht ennt Hoat jeschlote haft, ess daut seeha enj, uck fots mett daut gaunze Frindschauft.
Edwin Boschmann
Edwin Boschumann, Pastor vonne Jemeende Karlsruhe-Thomashof.
