Frind 25 – Somma 2012
Wann daut opp onse Ed uck een „Mennonite Paradise“ jefft, dann mott daut enn Belize lidje: Daut baste Wada, jrasslicha Straund, en aule meajliche Sorte von Menniste. Menniste, von den maun vleicht aul docht, dee sent utjestorwe. Desweajens wudd etj Belize uck tom mennischen Weltkulturerbe ertjleare welle, tom Jurassic Park fe Plautdietsche. En wiels daut soo ess, beschaftij wie ons aul wada mett dem Theema, nohdem de FRIND aul ver twee Joa eene Titeljeschicht ut Belize haud. Oba dittmol ess daut tjeen eefacha Reiseberecht, wie gohne deepa enn de mennische Jesallschaft enn Belize nenna. De Frind-Lesareise jeiht uck noh dissem Goade Eden. Soo lang aus etj bie de Plautdietsche Frind mettmoak, leh etj emma dolla dee plautdietsche Welt tjane. Etj haw bejrepe, daut it uck jansiets von Tjoatje en Jemeinde eene groote Jesallschaft von Plautdietsche jefft. Dee hawe eare ejne Veaunstaltinje, dee wie uck foaken enne FRIND veajestalt hawe. Meea Nähe setj wie to dee jinjere Plautdietsche, dee sich opp plautdietsche Sinjelsiede toopooste en sich too plautdietsche Parties traffe. Aula sele enn eare Nische ewalewe. En aula sent bie dee Plautdietsch-Frind wellkome. Wie hawe tjeene Beriehrungsangst.
