Hans-Jürgen Goertz: metteenaunda unjahoole

Ommfroag: Dee Kluft tweschen Plautdietsche en Hochdietsche

Tridj tom Hauptartitjel

1. Sennt See uck dee Meeninj en waut hoole See doavon, daut dee hiesje en dee plautdietsche Mennonite meist nuscht nich metteenaunda to doone habe?
2. Waut sent dee (historische) Jrind doafea, daut dee beid Gruppe sich uteneen jelewt habe?

1. en 2. Daut hiesje en plautdietsche Mennonite ziemlich jetrannt eena vom aundren ver sich hanlewe, kaun eena bedure, daut haft oba jeschicht­liche Jrind, dee wie jeajensiedich uck vestohne proowe sulle. Aus een Deel vonne Mennonite von Wastpreisse noh Russlaunt trock, habe sich nich bloos dee Sproake von dee beid Gruppe jetrannt, oba uck daut soziale Milieu en dee Lewenswies. Jiedet Deel word von eene aundre Omjewinj stoatj be-ennflusst. Bie jieda Grupp haft sich een bestemmda soziala Habitus mett eene konfessionelle Oat, woo dee Gloowe jelewt woat, identifiziet, soo daut daut schwoa jeworde ess  to bejriepe, daut dee aula toop to eenem Gloowe jehiere. Wie sulle ons jeajensiedich respektiere, soo aus wie nu mol sent, en nich eena dem aundren beschuldje, daut maun dem rajchten Gloowe veloare haft, uck wann dissa eene aundre Jestault aunjenohme haft.

3. Woont sent dee bekaunde Stereotype von dee watjselsiedich aundre Lewensform?

Oppe eene Sied een pluralistischa Gloowe, oppe aundre een Fundamentalismus, dee dee aundre Sied nich dem woahren Gloowe tooreatjent. Dee eene sent kulturell opjeschlote, dee aundre eeha kulturell veschlote.

4. Sull wie disse Paralleliteet ewawinde oda sulle aula enn eahrem Biotoop wiedableje (oda vedreje?), ohne daut sich eena omm dem aundren tjemmat?

Daut wudd sechalich beta senne, wann wie ons metteenaunda unjahoole wudde – behutsaum en volla Verstendnis eena fe dem aundren. Tjeena sull vesetje, dem aundren opp siene Sied to tratje. Wann wie oba opp disse Oat een bet dichta toop jekome sent, dann kunn een jieda dee Ennsechte vom aundren aus Jeleajenheit nutze, siene ejne Jrenze wieda to veschuwe en toop noh Weaj setje, en toop opp disse Weaj gohne enne Hopninj, daut derch sporadische Bejeajninje langsaum eene Jemeenschauft wausse kaun.

5. Habe See perseenlich eeha goode ooda schlajchte Erfoahrinje jemoakt?

Bie miene Oabeit, aus etj eeha Predja enn eene noddietsche Mennonitenjemeende we, haud etj maunchmol dee Jeleajenheit, mett russlauntdietsche Mennonite enn Kontakt to kome, dee fe mie ewahaupt tjeene Entteischinje we, uck wann disse Kontakte nich seeha foaken toostaund kaume. Dee Utsiedla haude daut to dee Tiet noch seeha schwoa, sich enne niee wastliche Welt trajcht to finje en opp niee Mensche en Enflisse enntogohne. Doch woll haft sich daut bit vondoag enne meschte Jemeendes je-endat. Opp jieden Faul sull daut Plautdietsche vondoag nich meeha Tranninje zementiere, oba daut sull ons halpe, enne aundre Sproak dee Seel en dem Gloowe von dem aundren to finje.

Hans-Jürgen Goertz es een mennonitischa Theologe en Historika. Eene zentrale Roll enn siene Oabeit spiele Thomas Müntzer en dee reforatorische Deepabeweejung. Bit 2002 we he Professor aune Universität Hamburg.

Leave a Comment