„Dit es ons eschtet diktat. We send schiler vonde August-Hermon-Franke-School in Detmold an besetje oine Plautdietsch AG. Sauwat goove doot bet nu noch nich...“, schreef Anita Pankratz (7a). Buta ar send en dise AG (alfabeetish no Femieljenome): Helene Esau (7e), Hilde Esau (7e), Waldemar Esau (7c), Elvira Görzen (7a), Heinrich Giesbrecht (7f), Annette Janzen (7e), Jennifer Janzen (7b), Angelika Klundt (7f), Andreas Lange (7a), Lena Pankratz (7a), Margarete Pankratz (7a), Tabea Pohl (7a), Elina Pries (7b), Nicola Ratzlaff (7a), Ina Reger (7a), Lena-Corinna Reimer (8b), Vladimir Sitnikov (8a), Erich Teichrieb (7b), Valentina Unruh (7b), Vitalij Unruh (8c) und Regina Willms (7f).

Doa mott eena sich esht eenmol dee Oge riewe, omm daut to jleewe: Meddweatj Nomeddach (inne 7. Stund!) sette ewa 20 Tjinja ute 7. en 8. Klaus (friewellich!) opp eare helltane Steela – omm Plautdietsh to lere! Tem eshten Mol jeft’et nemlich in eene Detmolda Privatschool (August-Hermann-Francke Gesamtschule) eene „Plautdietsch AG“. Dee Bokstowe „AG“ bediede „Arbeitsgruppe“ en buta dee mennische Sproak woat in disem 1. Haulfjoah 2001/2002 uck Sport-Driewe, Fetegrefere, Shach-Spele esw. aunjebode.

Soo seea daut uck ewarausche mucht, daut soovel junge Mensche Interesse aun dem oolen Dialekt habe, soo vestendlich ess daut uck wada oppe aundre Sied: Dise Privatshool es mol ver onnjefea 10 Joa jejrindt en oppjebut worde, tem grooten Deel von plautdietsche Russlaunddietsche en Ostwestfalen-Lippe. Fe vele woat dee Nome vom onnlenjst vestorwnen Otto Hertel bekaunt senne. Dee Idee, eene Plautdietsch-AG auntefange, kaum uck von eenem, dee vonne eshte Stund aun doabie jewese es, nemlich von David Waul ut Detmold – hee moakt em Moment dee Foto-AG en frejt sich, daut „siene“ aundre AG eenen Hupe Frucht brinje woat. Anita Pankratz tem Biespell, eene von dee pienje en kloke junge Shiela, es mett earem eschten Diktat vom 12. Septamba gaunz tofred. See shrift vleicht (noch?) een tjlien bet aundash aus ea Lehra Peeta Wiens, t.B. „doot“ aunstaut „daut“, oba intuitiv wehlt see Bokstowe, dee jenausoogoot meajlich send en bewisst doamett, daut hia intelligente en selvstbewusste Junges en Meatjes sette, dee sich mett Erfolch mett eare Muttasproak beschaftje. Vele in dise nieje Grupp rede noch goot Plautdietsch, aundre wada meist ewrehaupt nich meea, muchte daut oba jern oppfresche ooda lere.

Uck daut dee „Tjliena Prinz“ vom Franzoos Antoine de Saint-Exupery, opp dem Unjarechtsplon steht, moakt dise AG entressaunt: Dee „Mundart-Forscher“ Prof. Dr. Walter Sauer vonne Uni Heidelberg woat neachstet Joa toop met dee Plautdietsch-Freunde e.V. ut Oerlinghausen dee plautdietsche Versioon von „Der Kleine Prinz“, ewasat von Jack Thiessen ut Kanada, drucke lote. Dee Detmolda Plautdietsch-AG woat dit Boktje noch ver dem Publizere derchlese en dem Ewasata en dem Rutjewa eare Jedanke doarewa weete lote! Oba opp dem Plon fe dee neachste Moonate steht noch aulahaund aundret: esht eenmol lese en shriewe eewe! Buta dem saul to Wiehnachte een Sketch ennstudiet woare – Joosef en Maria sele hia uck mol Plautdietsh rede: En waut se rede, sele dee Tjinja em plautdietshen Niehen Testament nolese ooda ute Fantasie hole en shmock toopstale. Wan mol een Wot fehlt, woat daut goode ditje Wedabok von Thiesse halpe. Wea jern weete well, woo en waneea daut dan te seene senne woat, kaun sich t.B. uck em Internet informere: Een poa Shiela moake eene ejne Plautdietsch-AG-Sied em weltwieden Nat foadich! En wea weet, opp woone Jedanke en Projekte dee eena ooda aundra noch kome woat – daut Teema haft vele Siede en Fasette en dise Sproak moakt meea aus bloos Spoß: Aula Junges en Meatjes kome ut plautdietshe Femiljes, hia jeht daut aulsoo nich omm irjenteene framde Sproak!...

Een kortet Wot noch hinjaraun: Waut dise School en dise Tjinja doone, es ne jewaultje Sach. Mucht dise AG een Aunfang en een Biespel fe noch vel meea senne!