von Peeta Wiens, Oerlinghausen, 11. Septamba 2004

Jie habe bestemmt aul von dee eenjoasche Tweelinja ut Lemgo/Dietschlaunt jehet. Nelly en Peeta, dee plautdietsche Ellre von dise Meatjes, haude sich entschlote, eare Dajchta von Professa Benjamin Carson en Baltimore operere to lote:

Wiels Tabea en Lea aum Kopp toopjewosse send, woat hee vondoag, aum 11.9.04, toop mett vele aundre Doktasch dee beid Tjap trane. Uck wan beid Tjinja een ejnet Jehirn habe, soo es daut doch eene seea komplezede en jefearliche Operatsjoon. Jieda Moment es kritisch. Jieda Sekund wacht dee Doot ooda eene aundre Katastroof em OP-Sol. Klock seven zemorjens wulle se mette OP aunfange, en daut woat den gaunzen Dach ooda lenja noch dere, meend Dr. Carson.

Dee Femilje von "onse" Siameesische Tweelinja vetrut Gott en hopt opp siene Help. Uck eare Mennonite-Jemeind em Lippischen Lemgo bedt seea omm Help von bowe. En wan Jie, leewe Plautdietsch-Frind, vondoag een bet Tiet habe en een bet Plautz en Junem Hoat -- dentjt bitte uck aun dise Operatsjoon.

Welle daut Baste hope.

Meea ewa Tabea en Lea, eare Femilje, dee OP etc. es opp Hochdietsch em Internet opp dise Sied:

www.stern.de/zwillinge