Dee Organisatorin en Moderatorin Tatjana Klassner ut Warendorf schreef ons:

Etj frei mie, daut wie onse plautdietsche Jesalschaft wada waut aunbeede tjene. Dit es daut 7. Mol, daut wie dee Mensche dee Meajlichtjeit jewe, sich to eenem Kultur-Pregraum to trafe. En disem Joa es daut een Teauta Dach.

Een jiedra Mensch spelt ne Roll em Lewe, en moakt han en wada een Teauta, wan ahm waut nich paust. Daut woat soogoa jesajcht, „Hee spelt mett sien Lewe“, ooda „Hee sat sien Lewe oppet Spell“. Ooda „Dit’s en grootet Tjint“, „Moakt Ogtjes“, „Woo es dien rechtjet Jesecht?“ en soo wieda.

Een Teautaspell we emma aunjenome bie onse Mensche, en soogoa aus daut Rusche aunfunk to harsche: Tweschen dee Plautdietsche funke sich soone Mensche, waut nich lote wulle vonne Muttasproak.

Peeta Boajes es vondoag aul ewa 70, oba siene Oge lewe opp, wan dee Red ewa daut Teauta jeht. Hee es een bekaunda Teauta-Regisseur ute Orenburgsche Darpa, en drajcht vedeent dem Nome „Narodnyj“. Hee mok opp Rusch, Dietsch en Plautdietsch klassische en aundre Teauta-Sache. Regaulstje Peeta ut sien Teauta haft sich dem nemliche Nome vedeent, waut seea selde we manke Plautdietsche.

En aule Darpa word Teauta jespelt, bloos soone, aus ut Margens (Retkaja Dubrawa/Altaj) were tjeene, dee wiet en breed aula tjande. Dee were dee eschte, waut aunfunke daut Plautdietsche derch Leeda, Jedichta en Sketsche to saumele. Daut ha wie Ditjreews Merieche to vedanke, en eare Femielje, uck Woldemar en Galja Funke. Dee send uck vondoag bekaunt en Dietschlaunt nich bloos manke Plautdietsche; dee Grupp „Lerche“ daunze en sinje opp jratre Veaunstaultunge en gaunz Dietschlaut.

Dee Volklooagrupp „Sonneschien“ ut Alexseufeld (Polewoje/Altaj) we bekaunt aus dee jratste Grupp, waut eene Plautdietsche Tjast oppe Biehn jebrocht haud, dan dem eschten Plautz hild aus en sinjendet Teauta enne Altaj-Regioon. Ewa 30 Maun fohre foaken enne wiede Welt nenna tom dee Mensche eene Freid brinje, en wiese, daut maun stolz opp siene Muttasproak es. Etj bedua daut, daut dee Grupp hia en Dietschlaunt utnaunda jefolle es, en bloos etj en dee seea beliebta Peeta Brun no dee plautdiedsche Welt dem „Wajch nich veloare“ habe. Brune Peeta es uck wada mett ons mett, mett sienem Kabarett. Hee wiest een niejet Stetj ut sienem Pregraum, waut aum 27. Mei 2006 oppe Doaginj vom Vereen Plautdietsch-Freunde e.V. (Peeta Wiens en Frind) jewese woat.

Wie freie ons wada opp dee Femielje Panasch Nellie en Obraum, woone noch en Russlaunt aus Lehrasch sich populea jemoakt habe mett eare Sketsche, waut see sich selwst utdochte. Dit Poa brinjt soo vel Leew to eenaunda oppe Biehn, daut foaken dee Trone kome. Den en Tina Wedels es tjeen Wajchj too wiet, wan et om Plautdietschet jeht. Neuwied en Bonn send fe den aus hinjere Goades.

Tina Wedel haft sich escht en Dietschlaunt verrem Plautdietschem enjesat, oba fots soo erenst, en stoatj, daut see een grootet Dankscheen wet es! See sinjt, schrift selwst eare Leeda, dea es nuscht to schwoa ooda to dia, wan et om Plautdietschet jeht. See haft en Bonn eene Iniziatiew-Grupp organiset, waut uck plautdietsche Kultuapregraums aunbeedt, no waut dee Mensche rietend lore…

Etj sie stolz en jletjlich, daut uck Peeta Woatjentiens toojesajcht haft to kome, en waut veatobrinje -- wiels hee es een professionala Schauspela. Mett siene Fru Merieche spelt hee aul Joare en Joare en Dietschlaunt Femieljetheauta. En see foare daut gaunze Joa mett eare Behnstetja derch gaunz Dietschlaunt.

Ons Sehn Alexej Davydov mett sien „Teauta aum Steen“, woo uck mien Maun Josef Klassner en uck dee Dochta Lariessa doabie send, stale dem „Tjliena Prinz“ von Saint- Exupery vea.

Galja Kloses-Scholl moakt eene Moodeschau, Katariena Voht ut Hamburg tjemmt mett eare Teautagrupp. Dee „Schlorre“ ut Warendorf beede vel tom Lachajet ut onsem plautdietschem Lewe aun – mettem Pregraum „Soo jeht et enne Welt“. Jaunzes Wietj tjan wie goot aus Koch, Leeda-Senja en Jedichte-Schriewa, en ditmol leh wie ahm noch von eene aundre Sied tjane: aus Pantomiema.

Wie welle uck dee Einheimische enlode, mett earem Münsterplatt. En dan es doa noch soont, waut etj nu noch nich verode well…

Woone Roll wie aula mol em Lewe spele, frajcht sich bestemmt een jiedra. Oba onse Roll aum 29. Aprell en Münster, woo dee Mennoniete nich onbekaunt send, es dise: Wie welle ons jeajensiedich eene tjliene Heimat schentje, mett Freid en mett Bejeajninj.

Brinjt Bekaunde en Frindschauft mett. Dit es soont, waut een jiedra kaun. Welle opp onse Sproak ohne Angst rede, en ons beschentje mett plaudietsche CDs, DVDs, Betja, mett Leeda urzhent tom Jeburtsdach ooda to eenem aundren Dotem. Doa send emma meea Mensche, dee daut Plaudietsche vel reatjne. Etj wudd mie uck freie, Videos von June Darpa to tjrieje, tom daut et eene Meajlichtjeit gauf, een Film to moake, ooda dem Museum to jewe. Ooda, wan aula dee, waut Fotos vonne oole Veastalinja habe, waut en June Darpa mol were, eene Fotowaunt moake, ooda eenfach mie aufjewe tom wiedershan en een Bok nenn kome – dan we aul eene groote Sach jemoakt! Malt Junt eenfach, wea begowt es, ooda wea wem tjant. Dee Sproak to velere es leichta aus to behoole, en mett ahr veschwinj wie aus eene lndividualitet…

Lot Junt dis Dach nich derchgone!

-------------------------------------

Readaktioon: Wea meea ewa dem Teauta-Dach en Münster weete well, kaun jern em Plautdietsch-Kentooa (Tel. 05231-3089818) ooda jern uck bie Tatjana Klassner (Tel. 02581-634487) aunroope.