Kultuaowend met Musitj, Theauta, Kabarett en Lyrik

D'Friesens kome ut Amerika.

Dee Plautdietscha Kultuaowend kaun sich seene lote. Dee Organisatore hawe eene goode Mischung jefunge. Aum Sinnowend, 7. Septamba, trede enne Aula vonne AHF-School enn Detmold Klock 19 disse Tjinstla opp: D’Friesens, Peter Braun, Peter Warkentin, Johann Penner, Peter Friesen, Andreas Dück, Katharina Fast en Ella Deppe en Elisabeth Zacharias.

Plautdietscha Kultuaowend em Rohme vonne Plautdietsche Medienkonferenz: Sinnowend, 7. Septamba, Klock 19, AHF-School, Anne-Frank-Straße 1, Entrett frie.

D’Friensens kome extra ewa daut groote Puddel von Amerika. Daut es eene Fimilje-Band, dee sinje eene Mischung von tjristliche Country-Musitj en Southern Gospel – enn Detmold ver aulem opp Plautdietsch. Dee Southern Gospel entstund em Siedwaste vonne USA en word von seeha fromme Musika jespelt, dee sich vom „Schwoaten Gospel“ aufjrenze wulle.

  • Peter Braun (Peeta Brun).
Peter Braun (Peeta Brun) es dee bekaundesda plautdietscha Kabarettist. „Hee es een Filosof“, sed Tatjana Klassner, „bloos vonne onnjeweenliche fe onse Mensche Sied: dee lockere.“ Jebore 1964 enn Polewoje/Altaj, haft Peeta aul emma enne School vejestallt, jesunge, jedaunzt en Theauta jespelt. Iirjentwan entdatjt etj uck dee koomische Oda enn mie en dee Tootjitja naume mie uck aun“, vetallt Peeta Brun.

Een Filosof en Kabarettist

Aune 1981 jintj Peeta Brun enne Hochschool fe Bildung en Kultur noh Barnaul, dee hee aune 1985 mettem Diploom aus Regieleiter fe Mausenveaunstaltungen aufjeschlote haft. Hee we künstlerischer Leiter em Klubhus enn Polewoje en fe veschiedne Faste en Projekte . Noh Dietschlaunt jekome (1991), studied hee aune Fachhochschule Paderborn en tjrech daut Diploom aus Sozialpädagoge. Hee oabeid vele Joa mett oole Mensche enn eenem Seniorenzentrum. Newenaun lewt hee siene künstlerische Fähigkeiten ut: mol opp Rusch, mol opp Plaut en mol opp Dietsch. Peeta Brun sajcht: „Daut wichtichste bie miene Opptredde ess mie dee Dialoog tweschen dem Publikum en mie, siene Reaktioone opp Dinja, dee etj opp de Biehn brinj.“

Andreas Dück brocht ver eenja Tied twee CD’s met plautdietsche Leeda rut: „Von disse en jane“ en „Von vondoag en jistre“. Von disse Songs haft sich ver aulem „Plautdietsche Mensche“ derchjesat, maun kaun aul saje, daut es eene Oat plautdietsche Hymne.

Katharina Fast en Ella Deppe trede toop opp.

„Musik en Leda send met mie toop oppe Welt jekoume“, sajcht Ella Deppe. See ess enn eenem plautdietschen Darp enn Kirgisien, dicht bie dee chinesische Jrenz, oppjewosse.

Katharina Fast deed aul em Ella von dree Joahre nuscht leewa aus to sinje. Aul enne School schreef see dee eschte Leeda en Jeschichte en trad doamet opp. Auls Kultuahus-Leitarin jrind see dee plautdietsche Gruppe „Sonnenschin“. Se fiede plautdietsche Theautastetje opp en pfleajde daut plautdietsche Daunz- en Leedagoot. Katharina sajcht: „Etj sinj nich moa jern, sondern les opp Wonsch uck selfstjeschrewne Kortjeschichte en unjahool met mienem Kabarettprogramm.“ See es aulso eene komplette Entertainerin – auls Autorin, Senjarin en Kabarettistin. En eahrem Kabarettprogramm vetallt see witzje Jeschichte ut dem Auldach von eene Utsiedlafru. Seeha erfolgreich we see uck aus „sinjende Toilettefru“.

Groota Opernsenja

Johann Penner es nich moa een butajeweenlicha Ariensenja, hee es uck een begnadeter Unjahoola. Penner haft aune 2009 een pedagogischet len tjinstlarischet Jesangsstudium aune Musitjhochschoole enn Weimar en Detmold aufjeschlote. Aus Konzert- en Oratoriensenja ess hee aul zimlich bekaunt. Sien Repertoire omfot Bach siene Oratorien soo aus uck vele von siene Kantaten, Hendel sien Messias, Haydn siene Schöpfung, Rossini siene Petite Messe Solenelle en velet meeha. Uck enn Opern tritt hee emma wada opp, aus Belmonte enne „Entführung”, Max em „Freischütz” oda hee ewanemmt Rolle enn „La Traviata”. Etj erlewd Johann Penner mol bie eenem Konzert enn Wanne-Eickel unja dem Titel “Night of the Hymns”. Doa we hee Solist en sung met eenem grooten Chooa toop met eene Band. Met siene Dobbelroll aus Lehra en aus Senja tjemmt hee seeha goot trajcht: “Wiels etj eene fauste Sted aune School haw, kaun etj vel friea sinje en uck ohne Druck”, sajcht hee.

Opp demselwjen Fletj waundelt uck Peter Friesen, dee een Teenoa es. Woo goot hee sinje kaun, bewiese Videos opp YouTube, unja aunderem met dem Sinfonieorchester vom Musikfördervereen Barntrup. Em Internet steiht, daut hee een Fernstudium aum Trinity College of London absolviet haft.

Theautamaun en Schauspela

Peter Warkentin (60) – jebore enn eenem plautdietschen Darp enn Sibirien (Russlaunt). Noh dee Meddelschool haft hee een Studium enn dee Theautahochschool enn Moskau aum Maly Theauta (1976-1980) jemoakt. Doanoh Schauspela aum Dietschen Theauta enn Temirtau, Almaty (Kasachtan). 1995 Omsiedlinj noh Dietschlaunt. Metjrinda vom Russlauntdietschen Theauta Niederstetten.
Enn siene Tiet aus Schauspela haft Peeta Woatjentin meaha aus 60 Rolle jestaultet. Buta dee Hauptbeschaftjung aus Schauspela haft hee uck aus Moderator en Regisseur vele Kultua-Festivals enn Russlaunt en Dietschlaunt jestaultet. Von 1998 aun ess Peeta Woatjentin Dozent biem Theautabunt biem Launt Baden-Württemberg. Moakt Regie opp veschiedene Behns.

Uck dee Lyrik tjemmt nich tokort

Elisabeth Zacharias kaun seeha scheene Jedichta vefote en goot veadroage. See ess enn Russlaunt enne Altaj Region enn Nikolaidorf, 1958 geboren. Sie haft drei Kinder und tien Entjeltjinja. See ess selfststendje Schniedasche.

Horst Martens

Leave a Comment