Liesa Unger: ewerem Tallaraunt tjitje

Ommfroag: Dee Kluft tweschen Plautdietsche en Hochdietsche

Tridj tom Hauptartitjel

Daut jefft noh dee latzte Statistik vonne Mennonitische Weltkonferenz (MWK) meeha aus 47 000 Deepa/Mennonite enn Dietschlaunt (www.mwc-cmm.org/mwc_map/country/1082). Dee meschte von den jehiere to Jemeendes, den eahre Mettjlieda enne latzte Joahtiehnde ut Lenda vonne jewesne Sowjetunioon noh Dietschlaunt ennjewaundat sent. Disse soojenannde „russlauntdietsche“ Deepa/Mennonite habe tom jratsten Deel plautdietchen Hinjagrunt, oba nich bloos. Doa jefft daut uck Jemeende-Mettjlieda, dee ut aundre russlauntdietsche, rusche, dietsche oda noch gaunz aundre Kulture kome en Mettjlied enn eene „russlauntdietsche“ Jemeend sent, wiels see unjascheedliche Jrind habe, enn soone Jemeend Jeesus hinjaraun to gohne.

ONSE FROAGE
1. Sennt See uck dee Meeninj en waut hoole See doavon, daut dee hiesje en dee plautdietsche Mennonite meist nuscht nich metteenaunda to doone habe?
2. Waut sent dee (historische) Jrind doafea, daut dee beid Gruppe sich uteneen jelewt habe?
3. Woont sent dee bekaunde Stereotype von dee watjselsiedich aundre Lewensform?
4. Sull wie disse Paralleliteet ewawinde oda sulle aula enn eahrem Biotoop wiedableje (oda vedreje?), ohne daut sich eena omm dem aundren tjemmat?
5. Habe See perseenlich eeha goode ooda schlajchte Erfoahrinje jemoakt?

Jenausoo ess daut uck mett dee „hiesje“ Jemeendes. Doa jefft daut Jlieda, den eahre Familjes aul vele Jeneratioone doatoo jehiere en dee, je nohdem woo enn Dietschlaunt, ewa Joahhunadade unjascheedlich jepreajt sent. Dann jefft daut Mettjlieda, dee aus Flichtlinje ut Wastpreisse oda ut dee Ukraine doatookaume oda toojewaundat sent, Studente oda Migrante ut aundre Kontinente, dee aula enn disse Jemeendes nennfunge. En dann jefft daut nich weinje mennonitische Tjriste enne eschte Jeneratioon, dee enn eene vonne bestohnende Jemeendes tom Gloowe funge en sich oppnehme leete, omm enn disse Jemeendes Tjristus hinjaraun to gohne.

Nich aule soojenannde „hiesje“ Jemeendes en nich aule soojenannde „russlauntdietsche“ Jemeendes kome jlitje goot mettenaunda trajcht. Daut jefft Konflikte, daut jefft een Eena-aum-aundren-vebie-Lewe en maunchmol bemeje sich dee beid Siede, toop to kome en toop den Wajch to gohne, benna en teschen dee Kulture.
Ditt schriew etj uck ut dee Perspektive von mienem ejnen Lewe. Etj sie enn eene deepa-mennonitische, plautdiet­sche Familje nennjebore. Opp mienem Gloowens- en Lewenswajch hab etj „russlauntdietsche“ en „hiesje“ Jemeendes von eahre goode en schlajchte Sied tjane en goot senne jelieht. Waut oba miene Leew to Jeesus Tjristus siene Jemeend gaunz besondasch wausse leet, ess miene Bejeajninj mett deepa-mennonitische Tjriste ut aundre Deele vonne Welt bie dee Weltvesaumlinj enn Straßburg, Frankreich 1984. Bie disse Weltvesaumlinj hab etj bejrepe, woo tjlien miene Welt hia enn Dietschlaunt ess en woo bejrenzt see senne kaun. Etj hab jeseehne, daut dee jratsta Deel vonne deepa-mennonitische Jemeendes opp aundre Kontinente lewe, woo dee dietsche Kultua, off nu plautdietsch oda bayrisch, tjeene Roll spelt, oba dee Gloowe aun Tjristus en dee Deepa-Theologie enn jiedrem von disse kulturelle Kontexte eene groote Roll spelt.
Vondoag lewe dee meschte deepa-mennonitische Tjriste enn Jemeendes enn Äthiopien, woo dee Jemeendes enn dee Tiet vom sozialistischen Regime em Unjagrunt stoatj jewosse sent en nu enne Frieheit noch schwinda wausse. Dee neajchste MWK woat enn Indonesien senne, woo eene tjristliche Mindaheit em jratsten moslemischen Launt oppe Welt jelieht haft, Jeesus Tjristus enn eene multi-relijieese Jesallschauft hinjaraun to gohne. Dee deepa-mennonitische Welt ess groot en bunt.

Daut moakt mie ritj, wann etj ewa dem Raunt von miene Schiew tjitj en erlew, woo groot Gott ess en woo vel etj von Mensche oppe gaunze Welt doarewa liehre kaun, woo see Tjristus hinjaraun gohne. Doaweajen lod etj emma wada jern enn, mett opne Oge en Hoate derch Gott siene Welt to gohne, off nu hia enn Dietschlaunt oda enn aundre Deele vonne Welt, en sich doarewa freie, woo bunt Gott dee Welt jaschaufe haft.

Liesa Unger, Pastorin, Mennonitengemeinde Regensburg, 1. Vorsitzende, Verband deutscher Mennonitengemeinden (VdM).

Leave a Comment

UA-51537283-2