Ooltkoloniea sinje hochdietsche Leeda noh dee lange Wies. © Jakob Sawatzki.

Mexiko opp Plaut

Ooltkoloniea sinje hochdietsche Leeda noh dee lange Wies. © Jakob Sawatzki.

Wan maun enn een nieet Launt nenntjemmt, jefft daut gaunz jewess niee Enndretje, waut maun tjrjicht en waut maun metnemmt. Daut we enn Mexiko nich aundasch.

Maun frajcht sitj, waut dee Mensche beweajt, waut eant preajt, waut see doone en woo see lewe. Nich bloos daut jeplonde Prograum ess interessaunt, vel meeha jefft daut maunchet, waut maun soo meist bieaun sitt, erfoaht en tjane leht, daut maun metnemmt. Soo uck Mexiko.

Eenmol lehd wie von dee Jeschicht vonne Mennonite, daut see aune 1922 enn Chihuahua bie Cuauhtémoc aunsiedelde. Vondoag jefft daut soo om 60 Koloniee enn Mexiko. Dee sent em meist gaunzen Launt verstreit. See lewe seeha unjascheedlich derch dee Wirtschauft, Jemeende en uck Traditioone, dee mol dolla, mol weinja daut Lewe ennjrenze en uck kloa veaschriewe, woo maun lewe saul.

  • Mummtjes biem Koake. ©Jakob Sawatzki
Derch dee Reis enne Omjeajent von Manitoba, wooa rom 22.000 Plautdietsche wohne, ess mie veschiednet oppfjefolle, woovon etj een poa Sache erwehne well:

– Dee Mennonite en dee Einheima (Mexikauna) sent frintlich en wellich, Kontakt met Mensche von aundre Lenda opptonehme.

– Dee seeha unjascheedliche Oat, Jemeende to senne en School to hoole, soo aus uck sitj noh Traditioone auntotratje, schient bie vele tjeen Grunt to senne, sitj jeajensiedich to veachte ooda uttoschlute.

– Wirtschauftlich oabeit maun nich aus gaunze Jemeenschaft ooda Kolonie toop; vel meeha woare vele Familjebetriebe jefieht: Apel, Maltjarie, Aunhenjafabritj, Bumateriol esw. Oba maun kaun ohne vel to setje seehne, daut dee Mennonite doa jeschaftlich seeha tichtich sent. Dee 40 km lange Gauss (Corredor Comercial) enn Manitoba ess – soo word ons jesajcht – dee jratste Haundelsgauss enn gaunz Latienamerika.

– Maun lewt oppem Laund, oba derch dee Bejrenzung vom Grundwota setje emma meeha Bures aundre Weaj, eahren Lewensunjahoolt to moake.

– Dee Jugend ess vondoag seeha doaropp ut, unja sitj Enjlisch to rede, soo daut sich doch mauncha om daut Plautdietsch enne Tookunft sorjt.

– Daut „Museo Menonita“ lodt enn, meeha ewa dee Mennonitewelt enn Mexiko to lehre en tratjt vele Besetja ut dem gaunzen Launt en doarewa rut aun. Derch Privautinitiative word daut oppjebut.

– Eene Doagesreis fehd ons enne „Sierra Madre Occidental“, woo wie dee be-endruckende Boaj en Schluchte bestaune kunne, en uck met eene Gondel ewa eenen deepen Aufgrunt fuhre (Barrancas del Cobre bit ewa 1.700 m deep). Ewaraul were dee einheimische Tarahumara auntotrafe, dee doa aun Touriste eare Hauntoabeit vetjeepe.

– Daut onkompliziede Veheltnis tweschen dee Mennonite en dee hiesje Mexikauna drajcht doatoo bie, daut bie dee Mennonite seeha vele Oabeit finje, en doabie soo maunch eena soogoa Plautdietsch leht, om met dee Mensche beta utkome to tjenne.

– Uck wan dee Omjeajent vonne Butawelt foaken aus een von dee Droogeszene vepestet Launt doajestalt woat, moatjt maun aus Besetja von soowaut goa nuscht.

– Mennonite sent vebunge ewa wiede Jrenze; daut stald wie hiea faust. Wooa emma wie kaume, word wie frindlich bejreesst en maun fonk aun, sitj jeajensiedich to vetale: ewa Oabeit, Nomes, Vewaundtschauft, School, Wirtschauft en uck Wada – typisch Mennisch auleweajent.

Doa kaun maun schlussfoljre: Onse Sproak ess to jlitja Tiet uck onse Kultua, see be-ennflusst emma uck onse Dentjoat, onse Oat to haundle en den Auldach to jestaulte. Dee Sproak vebinjt, beritjat, moakt niee Weaj op. Doaderch hab wie, dee wie von sewen aundre Lenda noh Mexiko kaume, weens soo vel jeleht aus enn dee PMK selfst. Enn dem Senn ess soo eene Konferenz gaunzheitliche Bildung aun Tjarpa – Jeist – Seel. Toop meeha erretje!

Uwe Friesen, Menno – Paraguay

Leave a Comment