Plautdietsch-Freunde e. V.

Foto-Collage: Für die Plautdietsch-Sprecher weltweit wird inzwischen an einer eigenen Sprachversion der Wikipedia gearbeitet.

Wea von ons bruck nich han en wada mol dee Wikipedia!? Dise friee Enzyklopedie es dochwoll daut mescht-jebruckte Lexikon em Internet. En uck doaweajen seea maklich, wiels aula groote Sproake eare ejne Versioon habe. Uck vele tjliene Sproake habe nu aul eene ejne Sproak-Versioon vonne Wikipedia -- uck dee Plautdietsche send aul meist soo wiet: MIEN LEXIKON heet daut niee Projatjt vom Vereen Plautdietsch-Freunde e.V. en dise Aktioon saul doatoo biedroage, daut dee plautdietsche Wikipedia een bet meea en beta em Schwung tjemmt. Hia es een Extra-Blog fe daut Mien-Lexikon-Projatjt mett vele Informatioone:

http://mien-lexikon.blogspot.com/

Entresse? Wea nich biem Projatjt mettmoake well, oba doaweajen doch aune plautdietsche Wikipedia schaufe en uck mol waut schriewe, dee es uck seea doatoo enjelodt:

http://incubator.wikimedia.org/wiki/Wp/pdt/Hauptsied

Bild: Poster für den plautdietschen Kino-Film Stellet Licht. Maria Pankratz aus Espelkamp (Bild) spielte eine der beiden Hauptrollen.

Aum 2. Aprell 2009 (Donnadach) es entlich dee Kinostart en Dietschlaunt fe dem plautdietschen Film Stellet Licht. Dit send dee Termine:

Berlin fsk-Kino ab 2.4.09
Berlin Hackesche Höfe ab 2.4.09
Hamburg 3001 2.4.-22.4.09
Nürnberg Filmhaus 27.4.-13.5.09
München Werkstatt-Kino 14.5.-27.5.09
Frankfurt Mal Sehn Kino 21.5.-3.6.09
Saarbrücken Filmhaus 4.6.-17.6.09

Dee Spelfilm Stellet Licht von Carlos Reygadas (Mexiko) haud aune 2007 en Cannes (Frankreich) Premiere en haft international vele Priese jewonne. Stellet Licht es dee eschta Kinofilm opp Plautdietsch en word/woat oppe gaunze Welt jewese. Dee Jeschicht, woone en disem Film vetalt woat, es nicht eenem jiedrem Mennist siene baste Jeschicht...

Eene goode Idee es emma: Mol seene, waut dee Plautdietsch-Frind doone... Vleicht janket mie daut mol doabie to senne!?

Nu em Feebua es eene Grupp von ewa 40 Lied to Gaust bie dee Menniste en Belize! Daut woat je dan vel to vetale jewe, wan se wada tridj send! En wan Jie jern wiet em Verut plone, dan moakt aul nu een grootet Tetjen biem 21. Novamba 2009 -- dan es dee ditjoasche Plautdietsch-Doaginj. Wada en Detmold em Hus vonne August-Hermann-Francke-School.

En wan Jie NU NOCH EN DISE MENUTE waut Entressauntet en Nieet en Plautdietschet habe welle, dan tjitjt doch eenfach mol en dit feine Video vonne Rampels en Tjetlasch nenn:

Detmold, 13. Dezamba 2008: Plautdietsch-Frind ut gaunz Dietschlaunt tjitje sich korte Videos utem Internet aun: eare ejne Jeschichte, eare ejne Sproak! Fe daut baste Video jefft daut een Pries - eene schmocke niee Digital-Kamera.

Lukas Wiens, woona dee Idee fe dit Projatjt haud, ewajefft Evelyn Jabs dee goode Kamera. Evelyn haft sich dit Jeschentj mett earem Video vedeent: See filmd eare Mutta mette Wiehnachtsjeschicht Dee beesa Roobat...

Dee betolde Projatjt-Tiet von MOVING MEMORY es to Enj. Dee Plautdietsch-Frind haude von Aktion Mensch (dieGesellschafter.de) Jelt fe dit Projatjt (fe Beamer, Kamera, ...) jetreaje en habe daut Baste doarut jemoakt. Uck wan dee Förderung nu to Enj es, daut Projatjt saul wieda rane, oba nu komplett ehrenamtlich:

Aula Entressede send uck wiederhan enjelodt, korte Videos to moake, dee wie oppe Moving-Memory-Projekt-Sied nenn doone tjene. Dee Plautdietsch-Frind woare dit Projatjt en Kooperatioon mettem Museum für russlanddeutsche Kulturgeschichte (Dr. Katharina Neufeld) emma jrata wausse lote...

Meea Infos: movingmemory.blogspot.com