Plautdietsch enne School enn Detmold

Eenen plautdietschen Dach tjeen Jie aum Dinjsdach, 23. Septamba, enne August-Hermann-Francke School enn Detmold erlewe.

Eschta Deel:

Klock 2 Nohmeddach jeiht daut omm daut Theema „Plautdietsch enne School“. Enjeloot send aula, besondasch Lehrasch en Ellere von Schooltjinja. Heinrich Siemens woat daut Theema moderiere.

Plautdietsch-enne-School-Motiv-2Nich blooss tus sulle dee Tjinja Plautdietsch rede. Wie sulle ons spoode, Plautdietsch uck enne School enntofehre, eh daut gaunz utjestorwe ess. Noch ess it nich too lot, oba wie motte ons reffle. Sesst jeiht ons daut soo auss enn Kanada, woo blooss noch dee ellre Mensche Plautdietsch rede, en omm een poa Joah vleicht goa tjeena meea.

Vele Ellre rede mett eahre Tjinja nich meea Plautdietsch. Daut Probleem habe nich blooss wie, daut habe uck dee hiesije Plattdüütsche. En wann wie toop een Probleem habe, dann sull wie uck toop noh eene Leesinj setje. Dee Bundesrot fe Nadadietsch, en dem aule hiesije Plattdüütsch-Varietäten en uck ons Plautdietsch vetrede sent, haft nu eene Broschüre rutjebrocht, een straumet Heft mett dem Nome: Auf dem Stundenplan: Plattdeutsch. Enn vele Bundesländer jefft daut aul Plattdüütsch enne School.

Omm disse Broschüre jeiht daut uck aum Dinjsdach, dem 23. Septamba, Klock 2 Nohmeddach, enne August-Hermann-Francke-School enn Detmold. Wie lode Junt aula enn, dee sich fe ditt Theema interessiere: Komt noh Detmold, vleicht woat je nu endlich waut doarut, daut uck ons Plautdietsch enne School unjarecht woat.

 

 

Leave a Comment