Menno Simons mit I-Pad auf Facebook.
Kort ver Wiehnachte kroop dee niee Utgow vom FRIND-Journal derchem Schornsteen ooda Postkauste von vele Plautdietsche en Dietschlaunt – en dise Doag dochwoll entlich uck bie vele Plautdietsche en Russlaunt, Kanada, Paragwai en sest woo! Daut Heft Numma 24 (Utgow 2011) es mol wada waut gaunz Feinet en Besondret jeworde! Bilda, Berechte, Literatua en emma wada uck Nies ut onse plaute Welt – aules schmock en opp Plautdietsch toopjestalt, ditmol vom nieen Chefredakteur Horst Moates ut Herne.
Utem Ennhault:
– Wooa tjemmt daut Plautdietsche soo rajcht hea? Onse Muttasproak haft eene gaunz besondre Jeschicht (Rogier Nieuweboer)
– Een ajchta Pana mett blauem Bloot: Wootoo plautdietsche Nomes vepflichte (Nelli Nachtigal)
– Dem Haulfmon sien Farjoa: Dee Araber en vondoagsche Jeschichte ut 2001 Nacht (Peeta Wiens)
– Mejal em tjlienen schwoaten Tjleet: Dee Bokerfolch von Rhoda Janzen en aundre mennische US-Schriewasch (Horst Moates)
– Hoarms en Thun foare noh Mexiko: Twee Reisende ut Dietschlaunt besetje een Mennistelaunt, woo Apel aus rusche Ritsche heete (ewasat von Katerina Jabs)
– Taunte Jreeta stoawt (Jack Thiessen)
– Weltwiet Resse riete – Facebook ooda leewa Fretbok: Woo sich dee Plautdietsche mett eahre Frind oppe gaunze Welt
– Schnette vetahle tjene (Horst Martens)
Wea dee Plautdietsch FRIND, weltwiet dee eenzje Tietschreft oppe Menniste-Sproak, noch nich haft, sull sich spoode en hia bestale: info@plautdietsch-freunde.de
