Plautdietsch-Freunde e. V.

Detmold, 13. Dezamba 2008: Plautdietsch-Frind ut gaunz Dietschlaunt tjitje sich korte Videos utem Internet aun: eare ejne Jeschichte, eare ejne Sproak! Fe daut baste Video jefft daut een Pries - eene schmocke niee Digital-Kamera.

Lukas Wiens, woona dee Idee fe dit Projatjt haud, ewajefft Evelyn Jabs dee goode Kamera. Evelyn haft sich dit Jeschentj mett earem Video vedeent: See filmd eare Mutta mette Wiehnachtsjeschicht Dee beesa Roobat...

Dee betolde Projatjt-Tiet von MOVING MEMORY es to Enj. Dee Plautdietsch-Frind haude von Aktion Mensch (dieGesellschafter.de) Jelt fe dit Projatjt (fe Beamer, Kamera, ...) jetreaje en habe daut Baste doarut jemoakt. Uck wan dee Förderung nu to Enj es, daut Projatjt saul wieda rane, oba nu komplett ehrenamtlich:

Aula Entressede send uck wiederhan enjelodt, korte Videos to moake, dee wie oppe Moving-Memory-Projekt-Sied nenn doone tjene. Dee Plautdietsch-Frind woare dit Projatjt en Kooperatioon mettem Museum für russlanddeutsche Kulturgeschichte (Dr. Katharina Neufeld) emma jrata wausse lote...

Meea Infos: movingmemory.blogspot.com

.
Dit es butajeweenlich en waut gaunz Besondret: Aum 8. Moaz 2008 send Rudy Wiebe en Miriam Toews bie ons to Gaust! Teewsche en Wieb, beid tale to dee baste Schriewasch manke Literaute en Kanada. En beid habe ewa "eare" plautdietsche Tjintheit en Kanada jeschrewe!...

Meea Infos kome noch!

Vom 8. bettem 10. Feebua trafe sich en Oerlinghausen (NRW, D) Mensche, woone opp Plautdietsch schriewe (welle) to eenem
Literatua-Seminoa. Agnes Goosse (Jiesbrajcht, Literaturkreis der Deutschen aus Russland) en Hendritj Siemens (Plautdietsch-Freunde) habe daut organiset en leide uck dee Referate en Diskussioone.

Aum Sinowent oppenowent (9.2.08, Klock 19.00) jefft daut eenen opnen Owent mett Jedichta, Jeschichte en Leeda opp Plautdietsch -- aula Entressede send enjelodt! Daut Schriewa-Seminoa es enne Heimvolkshochschule (HVHS) St.-Hedwigs-Haus, Hermannstr. 86, dicht bie Bielefeld. Auf daut Motto "Plaut schriewe, oba nich too plaut..." uck omjesat woat? Well hope! En hangone en selwst seene!!

Daut Bilt hia bowe es ut tweebak.blogspot.com

Dit es nie - en goot! Tatjana Klassner haft ea haulwet Lewe lang jesaumelt en jesaumelt en oppjeschrewe en oppjeschrewe: Aules waut dee plautdietsche Mensche en Russlaunt, Dietschlaunt en sonstwoo saje, wan se waut oppen Punkt brinje welle. Ooda, wan dee Menniste waut saje welle (ooda sinje!) mett soone Wed, woone aul emma en aulem bekaunt send - Sprichwed.

Ditjoa haft Heinrich Siemens sich dee Oabeit jemoakt en aules schmock derchjeseene, ewaoabeidt en aus Bok toopjestalt. Rutjekome es een wundaboaret en 267 Sied grootet Lexikon der plautdietschen Sprichwörter, Gedichte, Rätsel und Lieder.

Dit niee Bok kost bloos 15 Euro en kaun bie dee Plautdietsch-Frind en Detmold bestalt woare. Einfach aunroope ooda emaile!

Plautdietsch-Freunde e.V.
Moritz-Rülf-Str. 5
D-32756 Detmold

Tel. 05231 - 3089818
...nich von Dietschlaunt: +49 - 5231 - 3089818
Fax 05231 - 3089819
eMail info@plautdietsch-freunde.de

Kentooa-Tiede: Di, Do: 8-12 Uhr