Rum enne a-Lasco-Bibliothek erinnat doaraun, daut Menno Simons hia jeredt haft. © Martens

Wea ess een Mennonit?

Rum enne a-Lasco-Bibliothek erinnat doaraun, daut Menno Simons hia jeredt haft. © Martens

Omfroag von Viktor Sawatzki, SW-Radio, Detmold

Diss Artitjel es uck enne Druck-Utgow vonne Plautdietsch Frind (Dezamba 2016) to finje.

Daniel Stahl

Daniel Stahl

Daniel Stahl, Historiker, Dietschlaunt: Een Mennonit ess tjeen Mormone. Een Mennonit lajcht selwst faust, wanneea en off hee jedeept woare well. Hee blifft weahloos.

Eduard Klassen, Kanada: Een Mennonit ess eena, dee Plautdietsch kaun en weet, waut Tjieltje, Wrenetjes en Rokworscht sent.

Ernst Christian Driedger, Mennonitengemeinde Kohlhof, Speyer: Etj jleew, een Mennonit ess eena, dee von sich sajcht, daut hee Mennonit ess.

Sybilla Hebebettag: Mennonit senne heet Traditioon en enne Jemeend senne.

Günther Mekelburger, Neuwied: Fe mie ess eena een Mennonit, wann hee to eene Mennonitejemeend jehiet.

Heinrich Siemens WEB

Heinrich Siemens

Heinrich Siemens, Plautdietsch-Freunde: Mennonite sent Mensche, dee eenen jewessen Gloowe habe, dee Weahloosichtjeit lewe. Een Mennist ess eena, dee von Menniste aufstaumt. Off hee jleewt ooda waut hee jleewt, ess gaunz eendoont.

Holger Ruckmar, Niederlande, Predja en Theologiedozent: Een Mennonit ess een Deepa, dee Jeesus hinjaraun jeiht, doabie tjeen Jeweah enne Haunt nemmt en dee aundre daut Rajcht jefft, waut aundret to meene aus hee selwst.

Georg Schöpperle, Niederlande, Mennonitischa Predja: Fe mie ess wichtja, daut maun Tjrist, aus daut maun Mennonit ess, dee sich bewosst opp sien ejnet Betjanntnis deepe lat en oppe Grundloag vonne Heilje Schreft Gott en Tjristus tjanne jeleht haft.

Alfred Neufeld

Alfred Neufeld

Alfred Neufeld, Uni-Professor, Paraguay: Etj dentj nich, daut Mennonite onbedinjt Plautdietsch rede oda Dietsch senne motte. Mennonite sent soo auss Menno Simons, Michael Sattler, Felix Manz ooda Konrad Grebel, dee em Jeist vom Nieen Testament Tjriste sent en Jeesus hinjaraun gohne.

Johannes Harder, Mennonitengemeinde Enkenbach, Software-Entwetjla: Een Mennonit ess eena, dee sich to eenem Gloowe betjannt, dee nich onbedinjt emma gaunz eendiedich ess. Wiels Mennonite tjeen zentralet Organ habe, woo faustjelajcht woat, woo een Mennonit to jleewe haft, oba ut vondoagscha Secht dentj etj, daut opp jieden Faul dee Pazifismus doatoojehiet en dee Gloowensdoop. Dee Heakunft spelt oba uck eene Roll.

Wolfgang Schulz, Metjlied enne Berlina Mennonitejemeend: Een Mennonit kaun jieda senne. Aundasch kaun etj daut nich beauntwode. Hee sull soo aus een jieda Birja met Venunft derch daut Lewe waundre. Eena, dee dee Leeha von Menno Simons en dee Deepa tjannt en uck doanoh lewt en oppem Gloowe jedeept ess.

Uwe FriesenWEB

Uwe Friesen

Uwe Friesen, Paraguay, Archivar: Een Mennonit ess eena, dee sich derch dee Leeha von Menno Simons tom Tjristentum betjannt. Dee dee Erwossnedoop opp sienen Gloowe aunnemmt en ver aulem Tjristus aus Grundloag fe sien Lewe nemmt. Soo aus daut Motto von Menno Simons sajcht: „Eenen aundren Grunt kaun tjeena laje, buta dem, dee jelajcht ess, en daut ess Jeesus Tjristus.“ Doatoo tjemmt, waut dee Deepa emma wadaholt habe, dee Weahloosichtjeit. Daut heet, weahloos nich bloos mettem Jeweah, oba uck jieden Dach em Lewe: Fred moake, Fred lewe. Daut mott eena seehne em Omgang mettem Nohba, enne Familje, mett aula, dee eenem bejeajne. Daut ess dee jeistliche Sied.

Doa ess noch een aundret Bilt von Mennonite entstohne. Vele Mensche meene mett Mennonit eenen europeischen Typ, dee pienich ess, dee sich noh veare spoode deit. Tom Deel isoliet von aundre Mensche: een Mennonit derch dee Sproak en dee Kultua.

Astrid von SchlachtaWEB

Astrid von Schlachta

Astrid von Schlachta, Historikerin: Daut ess eene schwierije Froag. Ut miene Secht ess daut eena, dee sich to eene Jemeend helt, dee eenen jewessen Gloowe haft, soo daut daut Ethnische noh miene Meeninj ejentlich nich soo wichtich ess. Dee Mennonite sent vondoag grulich unjascheedlich. Daut ess uck eene Chance fe dee Mennonite, daut see seeha vel unja eenem Dack ve-eenije tjene. Uck seeha vel stohne lote tjene, waut foaken eene seeha scheene Diskussioon meajlich moakt, oba etj jleew, daut wichtichste ess, enn eene Jemeend to senne en daut to jleewe, waut dee jleewt.

Marianne, Schweiz, Pfarrerin: Een Mennonit ess fe mie een betjannenda Tjrist ut eene Sondagrupp (oba nich em Senn von eene Sekte), dee mett aundre Tjoatje toop oabeit.

Gary Waltner WEB

Gary Waltner

Gary Waltner, Mennonitische Forschungssted Weierhof: Een Mennonit ess eena, dee aun daut jleewt, waut Menno Simons enn siene Betja oppjeschrewe haft. Daut bediedt eenen lewendjen Gloowe aun Jeesus Tjristus, dee ons jeradt haft en dee Welt veseehnt. Fred en Gloowensdoop sent een Deel von dissem Gloowe. Fe mie ess dee Form vonne Doop nich soo wichtich aus enn maunch eene aundre Jemeend. Fe mie ess wichtich, daut eena dem lewendjen Gloowe aun Jeesus Tjristus betjannt en enn sienem Auldach daonoh lewt.

Arno Thimm, Niederlande: Een Mennonit ess eena, dee Jeesus Tjristus sien Lewe en sien Haundle ernst nemmt. Een Mennonit ess eena, dee sich to dee Deepabeweajinj betjannt, onaufhenjich vonne Oobrichtjeit. Een Weahloosa, dee Jeesus hinjaraun jeiht, dee dee Jemeend ernst nemmt.

OLYMPUS DIGITAL CAMERA

Johann-Peter Wiebe

Johann-Peter Wiebe, Leopoldshöhe, Ingenieur: Mennonite sent eene Frietjoatj, dee enne Reformatioonstiet entstohne ess en dee sich mette Tiet nich bloos theologisch, dee sich to eenem Voltj entwetjelt haft.

Emanuel Baumann, weetenschauftlicha Metoabeida enn Halle Wittenberg: Etj sie emma doavon utjegohne, daut Mennonite eenen perseenlichen Gloowe habe. Oba nu moatj etj, daut daut uck vel mett Familje en Traditioon to doone haft.

 

Leave a Comment