Coronavirus en dee Plautdietsche

Daut Coronavirus haft dee Welt em Griff. Foto: Miroslava Chrienova auf Pixabay

Coronavirus-Virus en Plautdietsche

Dee Corona-Epidemie betraft dee gaunze Welt. Oba besondasch Natioone, dee vel Wet opp daut jesallschaftliche Lewe laje, liede gaunz besondasch darunja. Dee plautdietsche Menniste fehlt dee Jemeenschaft.

Gottesdeenst Online

Dee Mennonitenjemeendes oppe gaunze Welt lote eahre Metjlieda nich auleen. Vele Tjoatje send technisch hoch versiert en streame eahren Gottesdeenst em Internet. Aundre wadarum nehme dee Aundacht verhea opp Video opp en stalle dee opp Youtube. Oba daut es nich een volwetja Ersatz fe Jemeenschaft.

Stallt junt mol vea, eena stoawt – en moa drej Aunjehieje dewwe tom Bejrafnis kome. Fe den derschnettlichen Dietschen es daut tjeene groote Veenderung, wiels soowiesoo nich vel meeha kome, om Aufscheed to nehme. Oba fe ons ess daut eene schratjliche Veastallinj.

Bejrafnis met weinje

Enne latste Utgow (21. Moaz) vonne “Mennonitische Post” vetallt Kennert Giesbrecht vom Bejrafnis von Abram Peters ute Kolonie Rio Verde enn Paraguay. Tolast lewd Peters met siene Fru em Altenheim. Weajen dee strenje Bejrenzunge haud man to dee Familie jesajcht, see durwe tjeen “normalet Bejrafnis enne Tjoatj hawe”. Ut dissem Grund kaum dee Eltesta noh dee Familje noh Hus, woo hee eene korte Trua-Aunsproak hillt. See sunge een poa Leeda en bede toop. Von tus fohre see dann diretjt nohm Tjoatjhoff, woo maun vom Doodjen Aufscheed nauhm. Moa Tjinja en Schwietjinja were doabie. Tjeene Entjel, Frind, Bekaunde oda wiederet Frindschaft. Daut es hoat.

Dietschlaund holt dee Birja tridj

Daut eschte Quartal em Joah ess fe vel Plautdietsche ut Dietschlaunt, dee tjeene Schooltjinja hawe, eene goode Meajlichtjeit, eah Frindschaft enn Sud- en Nodamerika to besetje. Ver aulem en Sudamerika ess daut Wada en disse Tied wundascheen. Dan blifft man jern een bet lenja en desweajens word man vonne Epidemie total ewarauscht. Wiels aule Gausjewalenda eahre Jrenze schloote, we daut Weekloage vonne plautdietsche Touriste groot. Dee meschte Reisende lewde bie eah Frindschaft, soo daut bie friea Kost und frieem Logis dee Koste nich explodiede. Trotzdem: Auls Dietschlaunt eene Tridjhol-Aktion auntjindicht, odmede aula opp. Aum Mondach, 30. Moaz, laund eene Boenig 747 oppem Flughowe von Asunción, en eenen Dach lota floge 360 Passagiere noh Frankfurt, unja ahn uck vel Plautdietsche. Jletj jehaut. Enn aundre Lenda motte dietsche Passagiere lenja wachte.

Fake News ewa Whatsapp

Haw Jie ewa Whatsapp uck aul koomische Maldunge tom Corona-Virus jetjreaje? Enn Whatsapp hawe soone Fake News – Faulschmaldunge – eene besondasch schlemme Wirtjung, wiels maun dee je von Frind en Bekaunde tjricht en desweajens besondasch doaraun jleewt.

Absurde Behauptunge

Eene faulsch Theorie besajcht: Daut Coronavirus ess en eenem Labor entstohne. Dee Grund: Wetenschauftla en Politika welle aufsechtlich Mensche venichte oda tomindes Jeld met Medikamente moake. Eena schrifft: Daut Coronavirus ess enn eenem Labor entstohne. Maun wull aufsechtlich Mensche venichte oda tomindest Jeld met Medikamente moake. Die beschiede Utsag von eenem Pseudo-Wetenschaftla: “Etj dentje, dee Coronavirus ess eene Mischung ut beschieda Waffe enn Tjrichsfiehrung … Daut Ziel ess gaunz kloa. Dee Schwechung wenn nich sogoa dee Zestierinj vonne Wirtschaft vonne US-Fiend.”

Jeloagne Tjede-Breew

Daut jefft uck Tjede-Breew, dee doatoo rode, dee Loft aunthohoole oda aule 15 Minute eenen Schluck Wota to drintje, wiels daut daut Virus enn den Moage speelt, woo et dan aufstoawe saul. Eene absurde Bootschaft, dee sich enne gaunze Welt vebreed.

Eene Strof Gottes?

Eenje Plautdietsche jleewe besondasch jern aun soone Veschwoerungstheoriee en aun Endtiet-Visionen. Fe eenje evangelikale Tjriste ess kloa, daut dee Corona-Virus eene Strof Gottes ess – fe een suendjet Lewe, fe den Gender-Wahn oda fe dee liberale Haltung to dee Homosexualitet. Woat uck jesajcht, dee Vepflichtung derche Politika, dee Tjoatje to schlute, ess dee Aunfang von eene Tjristevefoljung.

Pastor Christian Stockmann vonne evangelikale “Mandelzweig”-Gemeinde roopt sogoa em Internet doatoo opp, sich nich noh dee Jesatze to rechte. Dee Utgangsbeschrentjunge en daut Kontakveboot were “Wohnsenn” en deende moa auls Test, om dee Mensche enne Endtiet to manipuliere. Dee Predja vejlitjt dee Jesatze to dee Pandemiebetjampfung sogoa met dee Vepflichtung tom Hitlagruß em Dredden Ritj.

Bede halpt

Daut Coronavirus ess Deel vonne Schöpfung, uck wan wie ons den Grund nich ertjlere tjene. Daut es schienboa leichta, dem Diewel dee Schuld enne Schoh to schuwe. Oba dee Mennistejemeendes gohne veauntwotungsvoll met dee Pandemie om. Bede, saje Predjasch en Bibelwetenschaftla, daut halpt. Daut moakt nich immun jeajen dee Krankheit, ob maun kaun Gott siene Sorje vetalle.

Horst Martens

Leave a Comment