Frues baustle Maske

Foto: Tumisu opp pixabay.

Katharina Fast haft mie disse woahre Jeschicht fere Plautdietsch FRIND jeschetjt. See schrift: “Etj well vondoag eene Jeschicht ewa eene wundaboare Fru vetalle. Eah Nohme ess Maria Pauls, jeborne Rempel.”

“Wie send enn eenem sibirischen Darp Rosenwald jebore en oppjewosse. Ver een poa Doag schetjt see mie een Foto met Jesechtsmaske en den Kommentar: “Juhu! Dee eschte 21 Maske send foadich!” Opp miene Froag, fe wem see dee jeneiht haud, meend see: “Fe een Altenheim.” Etj auntwod sposich, ob see nich fots fe ons uck soone neihe wull. Dee Auntwot kaum prompt: “Seeha jern.” Auls etj meend, daut we moa auls Spoß jemeent, sed see: “Etj meenet oba opp Ernst. Woovel bruckst du?” Jistre haud see 35 Jesechtsmaske aun eene Praxis utjeleewat, nu neiht see fe een wiederet Altenheim 40 Maske. Aulet ut eahrem Material en von daut, waut Nohbasch eah jewe – en emonst. See neiht met Pause von Klock acht zemorjes bit Klock 10 zeowend. See ess bit dem 20. Aprell vonne Oabeit frie jestallt. See sed to mie opp Spoß, daut see sich fe Corona opfat. Etj sie jerieht en stolt, daut wie soone Lied unja ons hawe.

Katharina Fast

Oba doa send noch vel meeha Frues

Daut Jesechtsmaske-Projekt vonne RoosenwalderKatharina Fast brinjt ons opp den nieesten Staund: Maria Pauls haft Frindschaft mobilisiert, dee fe daut Altenheim “Haus Wiesecktal” enn Reiskirchen 100 Jesechstsmasken jeneiht hawe: Larissa Rempel 25 Stetj, Lena Büber 15, Lena Fast 14, Rosa Fast 4 en Maria selfst 42. Aules toop haft Maria 120 Stetj jeneiht – en see haft noch meeha Oppdrej. Dee Frues stauma aula ut Rosenwald, dem Heimatdarp von Katharina Fast.

Weet Jie von aundre Projekte oda uck tjlandere Halps-Aktioone? Wea halpt wem enn disse Tied?

Tjitj uck opp facebook/plautdietsch-freunde

Leave a Comment