Viktor Sawatzki es 50 Joah old jeworde. Hee es een Maun fe aule plautdietsche Aunjelejenheite, en soo haft hee sich auch omm onsen Vereen Plautdietsch Freunde vedeent jemoakt.
Viktor von Sewen es sien Aliasnohme, wiels hee ut Russlaunt ut dem Darp Numma Sewen kaum – dee Siedlunge em Beritj Orenburg were doa aula derchnummeriet. Mett dissem Nohme wull hee sich to siene plautdietsche Jemeenschaft toojehierich wiese. Aul tiedich mok he bie dee Plautdietsch Frind mett. Von Beruf es hee Elektrika. Daut haft hee sich nich dreeme lote, daut hee noch mol en eenen Beroof watjsle wud, en demm Plautdietsch dee Hauptsproak we: Hee fung mett plautdietschet Internetradio aun – mett dee Segenswelle (sw-radio.com). Siene Oabeit we soo erfolgreich, daut ut sienem Ehrenaumt eene volle Sted word. Enn soo haft he nu – jenau soo aus dee Verein Plautdietsch Freund – een Büro emm Gebäudekomplex vonne August-Hermann-Franke-School en moakt doa Radio. To jlitja Tied es hee uck fere Plautdietsch Frind aktiv – toop mett Anne Wiens, Fraunz Thiesse en Eduard Thun, dee sich vel doa opphoole.
Viktor nemmt fe sien Radio aules opp, waut mett Plautdietsch oda mett dem Mennonitentum to doone haft. Enne aktuelle FRIND (2 / 2015) haft hee tom Biespell eene 102-joahsche Fru interviewt, dee sich noch aune rusche Revolution erinnere kaun en aun Machno. Maun sitt, daut tjemmt uck ons selfst togoot. Butadem pfleecht hee weltwiede Kontakte mett Menniste. Wannet doaromm jeiht, eene Studienreis to organisiere, heft hee uck meschtens den Finja. Plautdietsch es aulso sien tweedet Lebenselixir – noh dee Bibel. Auls ejt ahm aun sienen Jeburtsdach froch, woone Sproak oppe Party jeredt word, sed Viktor: „Plautdietsch – wea daut nich kaun, es selfst draun schuld.“ Aulet Goode, Viktor!
Text: Horst Martens / Foto: Jakob Sawatzki