Bootschafta beenndruckt von Chacomenniste

Dee dietscha Bootschafta Claudius Fischbach en dee Honorarkonsul Johann Gossen biem Aufscheedsjesprech. ©Cooperativa Neuland

“Eene groote zivilisatorische Leistung” – soo beschrifft dee dietscha Bootschafta enn Paraguay, Claudius Fischbach, den wirtschaftlichen en sozialen Erfolch vonne Mennonitenkolonieje em Chaco.

Hia lewt maun em Woohlstaunt

Aum Enj von siene veehajoahsche Deensttiet besocht dee Diplomat daut latste Mol dee Kolonieje Menno, Fernheim en Neuland en hinjaleet opp siene Aufscheedsreise en eenem Interview, daut Monika Gossen fe Radio Zp 30 fied, eene Menj woame Wed. He haud jeseehne, daut maun enn disse dreje Regioon nich moa goot lewe kaun, oba sogoa em Woohlstaunt lewt.

Vebreedung vonne dietsche Sproak

Ewahaupt we ahm oppjefolle, woo groot dee dietsche Spure enn Paraguay send. „Etj goh enn eenen Supamoatjt enn Asunción, enn dem etj Christstollen en Plumemoos tjeep, daut steiht uck jenausoo oppe Produkte (moa enn Hochdietsch, An. d. R.) Ver Wiehnachte sinj etj enne Tjoatj dietsche Wiehnachtsleeda. Daut send Dinje, dee mie opp miene sass aundre Utlauntsposte nich wadafoahre send.“ En daut we uck dee Vedeenst vonne Menniste.

Moa eene Mindaheit haude dee dietsche Stautsbirjaschauft, oba aule were „natürlich Dreaja vonne dietsche Sproak en vonne dietsche Kultua.“ Dee Bootschafta gauf sich sachkundich, endem hee betoond, daut dee Auldachssproak Plautdietsch ess, „oba soo auls mie entweschen bekaunt ess, woat hia een absolut fehlafrieet modernet Dietsch jeredt.“

“Hia hawt maun jemeensam en enn Solidaritet een Jemeenwese oppjebut”

Enn siene veehajoahsche Deensttiet haud hee dee Mennonite „seeha wetschatze jelieht“. Bever hee noh Paraguay kaum, haud hee nusch von dee „Wirtjungsmechtichtjeit vom mennonitischen Jedankegoot“ jewusst en von dee Wichtichtjeit vonne Kooperative, „daut maun jemeensam en enn Solidaritet een Jemeenwese oppbut“. Fischbach wieda: „Doavon sie etj seeha beenndruckt“.

Dietsche Stautsbirjaschaft ess secha

Fischbach betoond, daut daut Honorarkonsulat enne Kolonie Neuland uck wieda bestohne saul, wiels daut seeha goot funktioniet. Monika Gossen stalld uck dee Froag, opp dee dietsche Stautsbirjaschaft, dee vel Menniste em Chaco hawe, besondasch ut Neuland, enn Tokonft bestohne blifft. Dee Bootschafta vesechad, daut aules soo blifft aus bit nu, wiels em Moment tjeene Veenderunge ertjanboa send“.

Leave a Comment