Dee eschta Bundesligaspela

Eduard Löwen für Hertha BSC Berlin em Ennsautz. ©Eduard Löwen, Hertha BSC Berlin.

Niee Utgow

Dee Bundesliga rannd enne Sportschau. Opp eemol erwehnd dee Reporta eenen Eduard Löwen. Moment mol, docht etj: Daut kaun doch moa een Plautdietscha senne. En soo ess daut: Eduard Löwen ess dee eschta plautdietscha Bundesligaspela, hee spelt bie Hertha BSC Berlin. Dee FRIND haft ahm interviewt.

KGB-Archive op ve aule

Daut lest man enne niee Utgow vom Plautdietsch FRIND, dee enne neachste Doag erschient. Daut Heft haft vel aundre Theemasch: Weet jie, daut dee KGB-Archive enne Archive nu ve aula op send. Wan je eenen Grootvoda oda eenen aundren Aunjehiejen hafe, dee vom Jeheemdeenst behaundelt worde ess, tjeen jie nu rutfinje, waut enne Akte steiht. Em FRIND efoah jie, woo daut meajlich ess. Noch twee aundre Biedrej ute Ukraine: Unja een Schien hawe se enne Ukraine mennische Graufsteena entdatjt. Stallt junt mol vea, woo dee Kommuniste met fromme Mensche omjinje! Butadem mok eene Grupp ut Neuland eene Rundreis derch dee Ukraine en entdatjte noch vel Ewabliewsel ute mennische Tied.

Interview met eenem Schauspela

Aundre Theemasch send: Dee Schauspiela Peter Warkentin vetallt ewa seine Erfoahrunge em Theauta en sajcht, waut hee vom Plautdietschen Theauta helt. – Dee musikalische en missionoarische Friesens-Famielje ut Kanada stall wie vea. – Wie nehme Aufscheed vom jestorwnen Waldy Hoffmann alias Erdmann Harder, dem wie noch em Juli auls Teautaschriewa veastallde. – Butadem hawe dee FRIND eenen nieen Lyrika tjanne jeliet: Meeno Koslowski schrifft Jedichta met gesallschaftspolitischen Ennhault. – Nohles vonne Medienkonferenz.

Vel Spoß biem Lese! – Wea tjeen Abo haft, kaun dee Tiedschreft fe 9 Euro bie Anne Wiens enn onsem Kontoa bestalle: info@plautdietsch-freunde.de.

Leave a Comment