Ministerin loft daut Museum biem Joahresempfang: “Groote Strohlkrauft”

Dee Ministerin Monika Grütters helt dee Fastred. ©Museum für russlanddeutsche Kulturgeschichte.

Daut Museum fe russlauntdietsche Kultuajeschicht enn Detmold woat vonne Politik met lowende Weda en met Jeld unjastett. Daut moatjte dee Jast uck biem Joahresempfang, to dem hohe Jast ut Berlin en Düsseldorf jekome were.

Bejeistat vonne Metoabeida

Monika Grütters, Ministerin ut Berlin, tostendich fe Kultua en Medien, hilt dee Fastaunsprock, uck een Vetreda ut Düsseldorf en dee Birjameister von Detmold hilde Rede. Doabie kaum dann rut, daut see zimlich bejeistat send von dee Oabeit von Museumsdirektor Kornelius Ens en siene Metoabeida, oba uck von aul dee, waut sonst noch metoabeide, tom Biespell vom Christlicher Schoolvereen Lippe (CSL), dee Initiator een Dreaja vom Museum send.

Plautdietsche unja dee Jrinda

Vele, dee aum Erfolg vom Museum metwirtje, send Plautdietsche oda hawe eenen plautdietschen Hinjagrund. Daut word doa zwoa nich jesajcht, we oba kloa, wann man sich dee List mette Jast aunttjitjt. Ut dem Grund were uck Vetreda von Plautdietsch FRIND ennjelodt. Nohm Programm worde uck noch Resse jeriete.

Unjastettung von Berlin lenja aus bit 2020

Om dee “seeha erfolgritje Oabeit” vom Museum noch stoatja auls bundeswiedet Kompetenzzentrum fere Belange vonne Russlauntdietsche to etabliere, vesprok dee Ministerin, daut Museum uck lenja auls bit 2020 met Jeld to fördere.  See betoond en eahre Fastred, daut dee Oabeit vom Museum unja dee Leitung von Kornelius Ens grooten Respatjt vedeent. Dee Strohlkrauft wudd nich moah bet Berlin retje, sondern noch wiet drewa rut – dee bemoatjenswirdje Sondautstallunge en eene tokonftswiesende Museumspädagogik wudde doatoo biedroage. 

Museumsdirektor Kornelius Ens wiest dee Ministerin daut Museum für russlanddeutsche Kulturgeschichte in Detmold.

Jeld fe Digitalisierung

Dee rutroagende Oabeit vonne Metoabeida es uck dee Grund, woromm daut  Museum em Oktoba eene omfangritje Toosautzfinanzierung fe eenen digitalen Ommbu tjrijcht. Unja dem Titel “Bi-Kultur digital” saul een experimentellet Pilotprojekt jestartet woare.  Die butajeweehnlihe Oabeit stalld uck Prof. Hans-Ulrich Baumgarten ut dem NRW-Ministerium fe Kultua en Wissenschaft  kloa. Uck dee Rejierung vom Launt haud dee wichtje Oabeit nich ewaseehne en deed vel, om dee lenjafristje Finanzierung secha to stalle. Daut Parlament haft doatoo uck jo jesajcht.

Birjameista haft Russlauntdietsche auls Rotjewa

Dee Birjameista vonn Staudt Detmold betoond daut Engagement vonn Museumsjrinda. Hee we deep vonne russlauntdietsche Birja enn Detmold beendruckt. “Wann etj Rot bruck, haft etj tien Persoone, dee etj froag. Doarunja send twee Russlauntdietsche.”

Dreemol so vel Deelnehma auls verja 

Museumsdirektor Kornelius Ens beschreef een poa Nieichtjeite. Daut Museum es bundeswiet enne Univeresitätsoabeit ennjebunge es, tom Biespell mett dee Ruhr-Universität Bochum.  Tolatzt betoond hee, “daut wie een Museum fe aula send. Wie send frooh, daut ons Aunjebott enne latzte dree Joah soo goot aunjenohme word. Daut meist dreemol soo vel Deelnehma kaume we uck een Vedeenst fe daut nie ennjerechtje Kulturreferat.” 

Scheene Musitj

Ohmrohmt word dee Veaunstaultinj derch een Streicherensemble unja dee Leitung vom Musitjpedagogen Paul Klundt. Dee junge Tjinstla were Schiela vonne  August-Hermann-Francke-Schulen Detmold. Dee Oabeit vonne Schule en vom Schooldreaja, dem Christlichen Schulverein Lippe, dee uck Initiator vom Museum es, lowd dee Ministerin seeha.

Museumsfinanzierung

Daut Museum fe russlauntdietsche Kultuajeschicht woad von 2016 aun ut dem Etat vonne Kulturstaatsministerin met 200.000 Euro em Joah unjastett. Berelin haft butadem Enj 2017 daut Kulturreferat fe Russlauntdietsche aum Museum ennjerecht, daut met 117.000 Euro em Joah jedroacht woad. Dee Christlicha Schoolvereen Lippe, opp dem sien Jelende daut Museum steiht, stallt jieda Joah 100.000 Euro to Vefiejung.

 

 

Leave a Comment