Ewaschwaminj em Chaco

„Doa ess eefach vel Wota”, sed een Birja vonne Kolonie Menno en beschreef doamet een Natuaereignis, daut maun em Chaco nich so erwartet: eene Ewaschwaminj.

Ejentlich dentje vele, daut daut een Wadaspruch ess. Oba uck dee dreja Chaco, een flacket Schwamlaunt tweschen Anden en dem Paraguayfluss, erlewt meist aule Joah groote Reajens, dee dee eene oda aundre Jeajent too vel Wota brinjt. Wiels dee Stape so groot sent en doa meist tjeene Mensche wohne, sent uck nich emma vele betroffe. Wan oba dee Jeajende vel Reajen erlewe, enn dee Mensche wohne, woat daut aul mol schwierich.
Daut reajend opp vele Stede dissen Somma seeha, en Fletja, Weaj, Hoff en Hiesa stunne opp eemol em ooda unja Wota.

Loma Plata ess eene Komm, daut Wota tjemmt nenn, oba schelt nich auf.

Wan daut benna korta Tiet von 700 bit 900 mm ooda meeha reajent, dann blifft uck doa Wota stohne, wooa daut sest nich deit. En wiels enn Loma Plata en enne Darpa doarom aul verhea Reajen jefolle we, staud sich daut Wota aun en besad Gruntstetja, Hiesa en Gausse. Een Deel von Loma Plata ess eene Komm, daut Wota tjemmt nenn, oba schelt nich auf. En soo musst maun Pompe oppstale en daut Wota rutpompe. Millioone Lita.
Vele Mensche kunne nich meeha vom Hof foahre; Hiesa stunne gaunz em Wota, maunche Schoole musste eahren Unjarecht fe lenjre Tiet aufsaje, Maltjbures kunne eahre Maltj nich vetjeepe, Kornfletja vedrunke em Wota, Veeh kunn nicht vekofft woare, esw.

Daut ess woll zimlich ontypisch fe dem eeha aus dreje Jeajent bekaunden paraguayischen Chaco. En doaweajens we daut interessaunt, woo unjascheedlich dee Mensche reajiede. Hiea eenje Utsaje von Betroffne, dee daut Wota bokstowlich bie sich em Hus, oppem Hof, em Maltjstaul oda sestwooa speade.
„Daut feehlt sich seeha koomisch aun, wan maun sitt, daut Wota tjemmt emma hecha, en du kaunst nuscht doa­jea­jen doone. Du feehlst die velote, helploos. Dan kome noch vele Nischiejasch en wiese met dem Finja … Dee sulle leewa Help aunbeede.“

„Opp eenmol hab wie Tiet tom met de Nohbasch to spaziere, toop Tereré drintje.”

„Dee soziale Situatioon ess positiv. Opp eenmol hab wie Tiet tom met dee Nohbasch to spaziere, toop Tereré drintje. Wie moake ons jeajensiedich Moot; unjanehme aus Famielje waut toop – tom Biespell bode gohne bie soo vel Wota enne Leajt.“
„Daut jefft uck vel Konfliktpotenzial. Maunche reaje sich doch schwind opp. Eena growt eene Ran, daut Wota aufschele kaun, dee aundra schett dee wada too … Daut jefft vel Ve-enderunge: Wan maun een Hus velisst, dee Maltjstaul em Wota ess, dee Heehna jeschlacht woare motte, wiels see nich em Wota lewe tjenne …“
„Maun vesietjt den Kopp bowe to hoole. Daut jefft je emma wada schwierije Situatioone. Daut halpt weinich, sich opp daut Negative to konzentriere. Wie sent je aula betroffe. Toofredne Mensche hab wie …“
Jiede Kathastrophe ess uck ne Jeleajenheit, eene Chance to wausse, dee Tiet aundasch to seehne, de Nervositeet auflaje, sich kontrolliere en nich doll ooda soogoa aggressiv woare. Aules haft sien Goodet.
Wan maun dee dree Hauptweda vom 90. Jubiläum von Menno, dee eschte Mennonitekolonie enn Paraguay, mol to eahrem Rajcht kome lat: Gloowe – Oabeit – Solidariteet, dan lat sich uck eene schwierje Situatioon opp eenmol gaunz aundasch seehne en jefft Moot, noh veare to tjitje.

Uwe Friesen