Dee Bediedinj vom Schaldok enne Russlenda-Utstalinj enn Steinbach
Oppe groote Russlenda-Utstalinj em Museum enn Steinbach henjt enn eene Atj een prostet schwoatet Tjleet met eenem witten Schaldok. Waut saul dan nu doaraun soo intressaunt senne?
Aus dee Russlenda enn Manitooba aunkaume, haude see een Hupe Reiseschult, dee see auftohle musste. Oba woo sulle see daut Jelt dan heanehme? Vele Famieljes bleef nuscht aunderet ewrich, aus dee ellre Dajchtre enne groote Staudt, soo aus Winnipeg ooda Vancouver, aus Deenstmejal oabeide to schetje.
Daut we fe dee Menniste waut Nies, see were daut jewahnt aus Buasch to ackre ooda Veeh to hoole, oba enne Staudt? Waut ha Struckbuasch enne groote Staudt veloare?
Oba dee junge Mejales funge sich doa schwind trajcht en vondoag vedeene doch woll vel meeha Menniste enn Kanada eah Jelt enne Staudt aus oppem Launt.
Dee Bediedinj von dissem Schaldok
Wie sent daut jewahnt, daut wie emma lese, daut Mana vearewajch jinje: Bartsch en Höppner trocke aus eschte noh Russlaunt, dan were daut Mana, dee aus eschte enn Kanada Launt sochte, en dan we daut wada eene Bonsch Tjedels, dee aus Delegaute noh Mexiko ooda Paraguay jeschetjt worde. Dee Mummtjes trocke emma hinjaraun en met eahre Oohmtjes met.
Doaweajen ess ditt Schaldok waut Besondret: Ver jenau hundat Joah were dee junge Russlenda-Mejales en Frulied dee Pioniere, dee aus eschte enne framde groote Staudt trocke en weese, daut Menniste vel meeha tjene aus Edschocke enne Ed stoppe ooda eene Kooh maltje.