Niee Opploag lat aundre Wedabetja wiet hinja sich
Aune 1977 schreef Jack Thiessen ut Kanada daut eschte plautdietsche Wedabok. Noh ahm habe emma wada uck aundre Mensche plautdietsche Wedabetja jeschrewe, oba Jack Thiessen sient ess bit vondoag daut wichtichste jeblewe en ess nu enne feffte Opploag erschiene – met dobbelt soo vele Weda aus enne latzte Utgow.
Nie: Ewasatung von Hochdietsch opp Plautdietsch
Soo aus wie daut aul tjane, woare dee plautdietsche Wed opp Hochdietsch en opp Enjlisch ewasat, oba eent ess dittmol nie: Em tweeden Deel von dissem Wedabok woare dee Wed von Hochdietsch opp Plautdietsch ewasat, nich meeha von Enjlisch opp Plautdietsch, soo aus noch enne latzte Opploage. Doaweajen ess ditt Wedabok nu besondasch fe dee Mensche goot to brucke, dee beta Hochdietsch aus Enjlisch vestohne – nich blooss enn Dietschlaunt, oba uck enne latienamerikaunsche Lenda, woo dee Menniste emma noch dietsche School hoole.
Waut ess daut besondre aun dissem Wedabok?
Enn jiedem Wedabok finj wie Weda, oba bie Thiessen finj wie noch vel meeha. Soo aus em Preußischen Wedabok, aun dem Thiessen ver langa Tiet metoabeide deed, aus hee enn Dietschlaunt we, om hiea siene Dokta-Oabeit ewa plautdietsche Weda to schriewe, haft hee vel voltjskundlichet Materiol jesaumelt, soo aus Leeda, Sprichweda, Jedichte: Aul daut, waut eeha vonne Grootellre en vonne Ellre aun dee Tjinja wiedajejewt word, oba vondoagschen Dach doch woll emma meeha vejete woat. Doamet daut nich gaunz veloare jeiht, steiht daut bie Thiessen em Wedabok.
Disse niee feffte Opploag sull enn tjeenem plautdietsche Hus fehle, en wea siene Frind ooda Frindschauft waut Goodet doone well, dee sull ditt Bok nich blooss fe sich tjeepe, oba fots een poa meeha bestale en veschentje.
