Dit ess doch seeha ewarauschend: Konst ess en latzta Tiet to eenem wichtjen Deel vonne mennische Jemeenschaft en Mexiko jeworde, behaupt een Artitjel, dee ewa eene Utstallinj tom 100-joahschen Jubileum schrifft. Dee junge Generatioone hawe een grootet Interesse aun tjinstlerische Oabeit, so heet daut enn dissem Berecht. En dee ellere Generatioone ertjanne dit Interesse aun. Daut sitt maun aun dee Bilda-Utstallinj „Trazos de una Herencia“ (Spure von eenem Oawgoot), dee eenen Moonat lang em Kulturzentrum von San Antonio (Mexiko) to seehne ess.
Utstalinj tom 100-joahschen Jubileum enn Mexiko. ©Gentileza Aniversariomenonitas
Diss Artitjel ess dee Grundloag fe onsen Berecht: http://aniversariomenonitas.com/trazos-de-una-herencia-pintando-la-vida-menonita/ Dankscheen aun dee Raúl Ramirez en Kollegen, daut wie daut Material brucke tjene.
Neejen Tjinstlarinne en Tjinstla wiese eahre Bilda, dee von eahre mennische Jemeenschaft inspiriet ess. Jiedra Bild haft aundre Elemente en ess doawejen eenzichoatich. Oba daut jefft uck eene roode Linie: dee Eefachheit vom mennichen Lewe.
Julio César Ponce, Verónica Enns, Tina Enns, Martha Funk, Jonie Rempel, Helena Klassen, César Gutiérrez Chacón und Miguel Valverde stalle eahre Bilda ut, jiedra met eene ejne Visioon vom Mennonitentum.
Dee Utstallinj word aum 13. August op jemoakt. Wundascheene Sonneunjajenj opp mennische Fletja, Frues bie dee Goadeoabeit, daut Portret von eenem Eejepoa, fredliche Rinda – dee Tjinstla tjrieje daut han, daut ruhje Lewe en dee deepe Bediedinj, dee Eefachheit en Traditioon em Launt vonne dree Kulture noch hawe, enntofange.