Maun kaun sich aul aunmalde to dee 3. Plautdietsche Medienkonferenz (PMK) vom 5. bitt 8. Septamba 2017 enne Kolonie Manitoba, Cuauhtémoc, enn Mexiko. Daut Aunmaldefensta finjt maun unja 3pmk.eventbrite.de.
Interessaunte Veadrej
„Toop meeja erretje“ heet daut Motto. Jemeensam well wie ons Plautdietsch stoatja moake en enne Medien enja toopoabeide. Jeplont send Veadrej en Workshops fe dee Bereiche Mennonitenjeschicht, Medienuttusch, Medienrajcht, Tatjst/Schriewwies, Radio, Musik, Video en Foto/Konst. Redna en Oabeitsgruppeleidasch send u.a.: Heinrich Siemens, Uwe Friesen, David Töws, Bennie Peters, Michaela Bergen, Viktor Sawatzki en Osvaldo Schapansky. Daut jenaue Prograum woad em Velauf vom Joah veöffentlicht. Aktuelle Informatioone jefft daut oppe Facebook-Sied unja „PlautdietscheMedienkonferenz“.
Kultua aum Owend
Uck dee Owende sele jemeensam vebrocht woare. Doatoo stohne veschiedne Kultuaveaunstaultunge oppem Plon aus tom Biespelle Filme en Veadrej ewa dee Mennonite oda een groota Kultuaowend aum 8. Septamba. Aum Aunschluss vonne Konferenz woare veschiedne Doagesreise aunjebode. Unja aunderem eene Tour to berühmten Cooper Canyon en eene Tour derch dee Kolonie Manitoba.
Organisation vonne PMK
Organisatore vonne 3. PMK send daut Organistioonsteam (Michaela Bergen, Viktor Sawatzki aus Leita, Abram Siemens en Osvaldo Schapansky) mett dee Steinreich Bibelschool en Radio Segenswelle. Dee Medienkonferenz tjemmt auleen derch ehrenaumtliche Mettoabeit en Spende tostaund. Unja www.plautpot.net kaun maun dee Konferenz finanziell unjastette. Wea noch Froage haft, mald sich unja: info@plautpot.net.
Foahre Plautdietsch Freunde uck noh Mexiko?
Maun kaun dem Prograum entnehme, daut dee Veasettenda vonne Plautdietsch Freunde, Heinrich Siemens, aune Medienkonferenz aktiv deelnemmt. Butadem jefft daut eenje Interessente, dee ewalaje, opp see eene Reisegrupp organisiere sele, dee nich moa aune Konferenz deelnemmt, sonda uck noch dee mennische Siedlunge en een poa Attraktioone von Mexiko besetjt. Wea sich doafe interessiet, kaun sich bie ons unja redaktionfrind@t-online.de gaunz onvebindlich malde (oba nich aunmalde). Dee Redaktioon woad dann dee Nomes von Interessiede wiedaleide.
