Fe Krefelda Jemeindeleita sent Breedajemeendla tjeene Mennonite
Christoph Wiebe, Jemeindeleita vonne oole (nich-russlauntdietsche) mennonitische Jemeinde enn Krefeld, leisd sich eenen growen Schnitza. Enn eenem Lesabreef aune Frankfurter Allgemeinde Zeitung (FAZ) vom 15.7. beschwead hee sich bie dee Zeitung, see haud enn eahrem Berecht ewa Euskirchen „unzutreffend von Mennoniten“ jeschrewe. Dee Mennoniten Breedajemeindes were „eine Abspaltung von Mennoniten“, dee een „eigenes Bekenntnis“ haude. En wieda: „Mit mennonitischen Gemeinden oder Gemeindeverbänden bestehen weder Zusammenarbeit noch Kontakte. Die MB Euskirchen ist nicht als mennonitisch zu bezeichnen …“
Hochnesichtjeit verrem Faul
Haft Christoph Wiebe nich meeha aule Kuffels em Schaup? Woorom spelt hee sich hiea auls Pop opp, dee aundasch dentjende Menniste utschlute well, obzwoa dee aul enne 23. Generatioon mennisch sent. Enne oole dietsche mennonitische Szene jefft daut eenje, dee russlauntdietsche Mennonite auflehne. Christoph Wiebe ess nich dee eenzja, dee soone Hochnesichtjeit ver sich hea drajcht. Waut uck schlemm ess: Vele von disse dietsche Mennonite weete noch nich mol, daut meist aule russlauntdietsche Menniste Plautdietsch rede.
Auls wie met onsem Plautdietsch-Frind-Staunt mol opp dem Jemeindedach vonne AMG (Arbeitsgemeinschaft Mennonitischer Gemeinden in Deutschland) were, froch ons eene Fru: „Ach, Plattdeutsche! Kommt Ihr aus Ostfriesland?“ Eene Mindaheit, en daut sent dee nich-russlauntdietsche Mennonite, nemmt dee Meehaheit, en daut sent dee Russlauntdietsche, nicht too Tjantnis.
Uck Krititj ute ejne Reje
Maun mott een poa Mennonite togoot hoole, daut see den Breef von Christoph Wiebe nich kommentarlos hannauhme. Soo bedankt sich Bernhard Thiessen bie Christoph Wiebe enn eenem opnen Breef zwoa seltsamawies fe dee „Opptjlearungsoabeit“, om dan emmahan een poa kritischere Teene auntoschlone: „Dürfen wir einfach sagen, das liberale mennonitische Glaubensleben unserer ‚Vereinigungs-Gemeinden‘ ist richtig mennonitisch und alles andere nicht? Kommen wir da nicht wieder in eine uralte mennonitische Bannpraxis, bei der die eine sagt: ‚Du bist kein Mennonit!‘ und der andere sagt: ‚Nein, du bist keine Mennonitin!‘
Brücke-Redakteur met Empathie
Seeha vel sympathischa kaum daut opprechtje Schriewe von Benji Wiebe rewa, Redakteur von „Die Brücke“ en „mennonews“: Ich mag meinen Glauben anders leben, als die Brüder in Euskirchen. Ich mag ein anderes Verständnis haben, was Mennonit-sein bedeutet, eine andere Sicht auf die Welt haben, als die Geschwister. Aber ich möchte hervorheben, dass sie jedes Recht haben, ihren Glauben so zu leben, wie sie es nach dem Studium der Bibel für sich entschlossen haben. – Dankscheen, Benji.
„Jie hawe dee Bildung, wie den Jeist“
Om opprechtich to senne: Dee russlauntdietsche Mennonite tjene uck goot tridj stentjre. „Jie hawe dee Bildung, wie hawe den Jeist“, sed mol een Predja opp eene vonne weinje Konferenze, woo beid Sied toopkaume.
Daut saul uck veakome, daut Russlauntdietsche ewa Deutsch-Mennoniten auls „Heide“ jeredt hawe.
Horst Martens