Reuben Epp tjricht den Arnold-Dyck-Pries fe daut Lewenswoatj

Reuben Epp met sienem selfstjebuden Motooa-Rolla. Dee Schreftstalla we een begowda Hobbymechanika oba uck een leidenschaftlicha Jeaja.

Buta dem Arnold-Dyck-Pries, met dem wie eenen plautdietschen Schriewa*sche aunertjane, well wie jiedet Joah uck eenen Pries fe daut Lewenswoatj ewajewe, daut waut eena uck Lifetime Achievement Award nant. Doamet well wie erretje, daut dee Mensche, dee sich aul vele Joahtiehnde fe Plautdietsch ennsate, nich vejete woare.

Ruben Epp, Portrait.

Ditt Joah feiat Reuben Epp (Ruben App utjesproake) sienen 100joahschen Jeburtsdach. Uck wan hee aul jestorwe ess, freit hee sich bestemmt met ons, daut hee ditt Joah dem Arnold-Dyck-Pries tjricht.
Aum 7. Oktooba 2000 besocht Reuben Epp dee Plautdietsch Frind enn Dietschlaunt en laus ons siene Woatje vea. Dem Owent hab wie aus CD oppjenohme, dee enn onse Lauftje uck to tjeepe ess.
Vele tjane ahm, uck wan ahn sien Nome nich bekaunt veatjemmt. Oba siene Jedichta, soo aus Toom eschten mol Koafoahre, haft doch woll aul een jieda plautdietscha Mensch aul mol jehieat.

Mien Voda Reuben Epp

Tatjst von siene Dochta Keri Martens
Fotos toopjestalt von sienem Sehn Cory Epp

Reuben Epp ess aune 1920 enn Langham (Saskatchewan) jebore en doa uck oppjewosse. Hee we dee Ellsta von dree Breeda. Aul enn siene junge Joahre haud Voda een grootet Interesse aun Mechanik.

Em Aprel 1946 befried hee sich met Irmgard Epp. Onse ellste Sesta Valeda word aune 1947 jebore, en kort doanoh trock dee tjliene Famielje noh Aldergrove, B. C. Enne neajchste Joahre kaume noch dree Tjinja doatoo, twee doavon aus Poatje: Cory en Keri.
Mien Voda haft jern ewa siene leewste Interessen jeschrewe, ewa Mechanik en ewa Plautdietsch. Aum Aunfank schreef hee opp siene manuelle Schriewmaschien, lota opp eenem Computer. Hee word enn mehrere Fachtietschrefte en enn Der Bote publizieat.
Papa we een liedenschauftlicha Jeaja. Hee sed ons emma, daut eena eenem Tiea blooss dan daut Lewe nehme sull, wan eena vea haft, daut to ete. Doaweajen aut onse Famielje vel Elchfleesch, Boarefleesch, Hirsche en Lachs. Aune 1960, aus wie enn Terrace, B. C. lewde, schoot ons Voda lot oppen Owent eenen Boa doot, ladad ahm auf, honk daut Fleesch enne Garage en led daut Boarefal ennem Jefrieaschaup, doamet daut nich schlajcht woat. Aum neajchsten Morje hold miene Mutta Broot utem Jefrieaschaup, om ons Sandwiches to moake, en aus see dem Datjsel opmok en dem Boa doa benne sach, we see meist nich beschwiemt.
Papa we enne Tjoatj aktiv en stolt opp siene mennische Heakunft en dee plautdietsche Sproak. Hee brocht Stunde aun siene Schriewmaschien too, om Artitjel fe Der Bote too schriewe, en hee entwetjeld eene Schriewwies fe Plautdietsch. Hee schreef uck daut Bok The Story of Low German and Plautdietsch.

Reuben Epp bie eene Red.


Papa sien Interesse aune plautdietsche Sproak fonk aun, aus hee noh School jintj en Chaucer siene oolt-enjlische Jedichta laus. Hee ertjand dee Jemeensaumtjeite tweschen Enjlisch en Plautdietsch. Hee sach ehnlije Wed mette jlitje Bediedinj, soo aus: Knight. Soo fonk hee aun dee plautdietsche Sproak to studiere.
Papa jintj daut seeha scheen noh Dietschlaunt to reise en sich met Frind to trafe en niee Frind to finje. Hee red jern Dietsch en noch vel meeha Plautdietsch en kaum too Tiede nohm Fraser Valley en laus eenen Owent lang siene Jedichta en Kortjeschichte. Disse Veadreaj were bie dee dietsche Mensche beleewt en goot besocht.
Papa en Mama lewde eahre latzte Joahre enn Kelowna, B. C. See reisde jern met eahrem Wohnwoage en troffe sich met Frind enn gaunz Kanada.
Met siene Jedichta haft Papa vele Mensche oppe gaunze Welt bejeistat: enn Russlaunt, Dietschlaunt en enn Nod- en Latienamerika.
Ons ess daut seeha schod, daut hee met ons Tjinja niemols nich Plautdietsch jeredt haft, oba wie feehle ons aus Deel vonne weltwiede plautdietsche Jemeenschauft.
Voda we emma dankboa doafea, daut siene plautdietsche Oabeit aunertjant word.
Wie freie ons seeha, daut dee Plautdietsch Frind ahm ditt Joah too sienem 100sten Jeburtsdach dee Eeha erwiese.

Reuben en Irmgard Epp met Grootfamilje, Oppnohm von 1986. Fotografiet von Sehn Cory Epp, hinje, 3.v.l.

0

Hey, like this post? Why not share it with a buddy?

Leave a Comment

UA-51537283-2