Daut Joah 2022 fangt fe plautdietsche Literatuafrind trurich aun. Aum 3. Jaunua ess dee Autor Heinrich Rahn em Ella von 78 Joah enn Wiesbaden jestorwe. Rahn we een langjoahschet Metjlied vonne Grupp Plautdietsch Schriewasch en vom Literaturkreis der Deutschen aus Russland, dee en ahm nich moa eenen interessaunten Schreftstala, ob uck einen „feinen, leewtoljen Mensch meit eenem onjleewlich grooten Hoat“ seehne. See dretje dee Aunjehieje jeajenewa eah von Hoate komendet Bieleed ut.
Een Woatj ut Romaune, Kortjeschichte en Jedichte
Vele Kortjeschichte en Jedichte von Heinrich Rahn send en veschiedne Literatua-Tiedschrefte enn Dietschlaunt en Österreich erschiene, uck enn Almanache vom Literatuatjries. Veeha Vetalunge enthelt dee plautdietsche Anthologie „Ut onsem Lewe“ (2009, Tweeback-Verlag). Siene Woatje send butadem enn dee Betja „Das kleine Reh. Gedichte und Lieder“ (1992, Fischer Verlag) en „Elvira und Enrique. Reiseerlebnisse in Versen“ (2005, Verlag Wendepunkt) ve-opentlicht worde. Em Geest-Verlag send von Heinrich Rahn erschiene: „Der Jukagire“ (2008), „Aufzug Süd-Nord“ (2011), „Die Birkeninsel“ (2018). Fe sienen latzten Romaun „Die Birkeninsel“ word Rahn vom Hessischen Ministerium für Wissenschaft und Kunst jefördat.
Heimat Ukraine
Heinrich Rahn word 1943 em Darp Sparau, Ukraine, en eene dietsche Familje nenn jebore. Nohm Tjrich kaum siene Familje escht noh Nordsibirien (Deportatioon), dan noh Kasachstan. Enne Staudt Schtschutschink absolvied hee 1965 eene Ingenieurs-School en oabeit dan en veschiedne Bu-Kombinate auls leitenda Bu-Ingenieur. Von 1990 aun oabeid hee enn Dietschlaunt en veschiedne Architektur-Kontooasch. Em Ruhestaund kunn hee sich gaunz opp siene schreftstalasche Leidenschaft konzentriere.
