Hermann Heidebrecht ut Bielefeld ewalewd daut Virus enn Bolivien moa knaup
von Peter Giesbrecht, Missionoa enn Bolivien erschiene bie „Plautdietsch Frind“ Nr. 44
Auls Hermann Heidebrecht em Loftschepp saut, om noh Siedamerika to fleje, freid hee sich opp eene spaunende Tiet met vel boliviaunische Mennonite. Daut dee Reis soo spaunent woare wudd, daut hee soogoa met sienem Lewe aufschloot, haud hee nie nich jedocht. Hiea dee Berecht von Peter Giesbrecht, Missionoa enn Bolivien.
***
Moa twee kaume enn Bolivien aun
Aules fung met eene Ennlodinj toom Missioonsdach aum 18. Aprel 2021 noh Bolivien aun. Ut Dietschlaunt worde Hermann Heidebrecht (Veasetta en Missioonsveauntwotlicha vonne AGUM-Jemeindes) en aundre Vetredasch doatoo ennjelode. Noch verre Aufreis musst een Deel vonne Grupp weajen eenem positiven Covid-19-Test tus bliewe. Hermann Heidebrecht en Viktor Esau (Minden) kaume oba aum Ziel aun enn Bolivien, om doa aum Missioonsdach (met onsjefeah 800 Besetjasch) deeltonehme, oba uck om eenje Jemeindes to besetje.
Verre Tridjreis were beid Covid-positiv
Daut rand uck aules goot. Oba twee Doag noh dee Aunreis tjrech Viktor Corona. Hee haud moa leichte Symptoome met Feeba, dee noh een poa Doag weinja worde. Hermann Heidebrecht feehld sich goot en haud eene gaunze Rej von Deenste hinja sich, bet hee aum Owent nohm Missionsdach daut Jefeehl haud, hee haud sich vetjillt. Dee beid Mana musste aum Mondach nohm PCR-Test, om dee Tridjreis auntotrede. Beid were positiv. Dee Dokta veschreef uck fots eene Behaundlinj met Tablette en soo word dee Reis om eene Weatj veschowe.
Suastoffbehaundlinj enne Klinik
Viktor erhold sich schwind, oba bie Hermann stech daut Feeba, en dan entschloot wie ons, enn eene Klinik to gohne. Hiea word wieda behaundelt en uck aul dee Lung met Suastoff unjastett. Soo jintj daut bet aum neajchsten Sinndach, aulsoo eene Weatj nohm Missioonsdach. Sinndach zeowents schiend aules goot, Hermann haud uck tjeen Feeba. Aulsoo foh wie noh Santa Cruz, om Dinjsdach dee Reis noh Hus auntotrede. Doatoo kaum, daut dee Bridj enne Nacht noh Mondach fe dee neajchste Doag blockieat woare sull.
Krankehus met plautdietschem Dokta
Enn disse Nacht opp Mondach gauf daut oba eene Komplikatioon. Wie stalde Suastoffmangel bie Hermann faust en haundelde fots unja dee Aunleitung vom Dokta. Eene Suastoffbuddel en dee veschrewne Medikamente worde besorjt. Enne Tweschentiet foh wie noh dee Computertomografie. Enn Bolivien sent dee meschte Krankehiesa nich met aule Jerete utjerest, maun foat mette Patiente noh dee Zentre, woo dan dee Unjasetjinje jemoakt woare. Toolatzt wees ons dee Dokta enn een Krankehus enn Santa Cruz enn. Wiels eenje vonne baste Krankehiesa sich stiepade, COVID-19-Patiente opptonehme, musst wie enn een billjeret Hospital, woo nich soo goot bedeent word. Desweajens entschloot wie ons aum neajchsten Dach, Hermann met eenem Ambulanzfoahtich leewa noh Villa Nueva to brinje. Disse Klinik licht oba oppe aundre Sied vonne beriehmde Bridj – dee nu oba op we. Hiea we dee Behaundlinj aul vel beta. Daut Krankehus woat toom jratsten Deel von dietschem (plautdietschem? Mennischem?) Personal jefeht. Dee leitenda Dokta Erwin Martens ess een Dietscha (Mennist? Plautdietscha?), dee enn Bolivien utjebildt ess.
Dee Elteste kaume, om Heidebrecht to saulwe
Nu fung dee wertjlicha Kaumpf aun. Dee Unjasetjinjswete were nich goot en bleewe von Mondach bit Friedach praktisch onve-endat. Tweschenenn word ewalajcht, off dee medizinischa Deenst ut Dietschlaunt ewa dee Krankevesecherinj Hermann noh Hus fleje kunn. Oba dee Deenst velangd weajen dee Diagnosewete, daut Hermann fe den Transport aun een Beodminjsjeret aunjeschlote woare sull. Disse Situatioon mok ons to schaufe en wie leete ons emma wada oppe Tjnee faule, om to bede. Ons we kloa, woo ernst dee Loag we. Aum Friedachowent wees dee Röntgen-Oppnohm, daut meist 90 Prozent vonne Lung nich funktionieade. Aun dissem Friedach roopd wie dee Elteste, om Hermann noh Jakobus 5 to saulwe en em Gloowe to bede.
Ons bleef nuscht aundret ewrich, auls ons aum Sinnowent zemorjes to entschlute to intubiere (Loftschlauch em Haulsloftrooha enntofiehre) en dan to vesetje, noh Dietschlaunt to fleje. Met schwoarem Hoat fung wie den Dach aun. Noch eemol doarewa rede, noch een poa Unjasetjinje en dan oppem Dokta wachte.
Wie erfohre een Wunda
Auls hee mette Röntgen-Bilda kaum, moatjd etj aul waut opp sienem Jesecht. Hee wees ons toom Vejlitj dee Oppnohm vom Fridachowent en vom Sinnowentmorje en sed, wan eena een Wunda seehne wull, hiea we eent: Beid Lunge haude too Halft wada aunjefonge to odme! Wie kunne onse Oge meist nich true. Nu we kloa, daut Intubiere nich meeha enn Froag kaum. Butadem we dee auljemeena Toostaunt von Hermann relativ stabil. Daut we Sinnowent, Klock tiehn zemorjes bie ons en enn Dietschlaunt Klock veea Nohmeddach, kratjt auls doa intensiv jebedt word. Von dissem Moment aun gauf daut jieden Dach eene leichte Vebetrinj. Dee Appetit kaum langsaum tridj en dee Wete vebetade sich toonehment. Wie hawe dem Harrn vel jedankt. Daut Personal em Krankehus we soogoa sechtboa beweajt derch soone Jebets-erhierinje. Een Spezialist fe Covid-19 (een boliviaunischa Dokta ut Santa Cruz), dee met mie een ernstet Jespreatj fehd, musst noh eene Weatj toojewe, daut it eenem Wunda jlitjkaum.
Endlich wada tus
Aum neajchsten Sinnowent word Hermann utem Krankehus entlote. Wie fohre nochmol han, om eenen PCR-Test to moake, dee negativ utfoll. Nu kunn Brooda Hermann nuscht meeha opphoole, om nohtotjitje, off it nich Tickets noh Dietschlaunt aun dissem Owent gauf, dee it dan uck gauf. Daut jefoll ons nich soo seeha, oba Hermann jintj bejeistat oppe Tridj-Reis en kaum aum Sinndach jletjlich bie siene Famielje en dee Jemeinde aun.
Danke fe aule Jebede en uck fe dee Danksajinj fe Gottes Boarmhoatichtjeit.