Tjristlicha Hit – nu uck opp Plautdietsch

Utschnet utem Video "De Säajen".

Daut tjristliche Leed “The Blessing” jeiht omme Welt en woat millioonefach jeklickt. Opp Youtube jefft daut vel Versioone ut mehrere Lenda. Sogooa opp Plautdietsch ess nu eene Oppnohm entstohne. See heet “De Säajen” (“Dee Seajen”).

32 Senja ut sewen Lenda

https://youtu.be/irFXVKWpf9g

32 Senja en vel Musikaunte ut Paraguay, Bolivien, Brasilien, Belize, Mexiko, USA, Kanada en Dietschlaunt (von doa dee Opernsenja Hans Penner) were aun dem Prjojatjt bedeelicht – daut beschrifft dee Mennonitische Post vom 7. August. Noh dee Aungow vonne Tiedschreft spelde David Toews, Pedro Dyck en Eduard Giesbrecht eene wichtje Roll bie dee Heastallinj. Pedro Dyck haud dee Oppgow, dee 32 Jesangs- en dee Musitjbiedrej to eenem harmoonischen Gaunzen to montiere. Ewa 130 Stund saut hee doabie aum Mischpult.

Jieda naum daut Leed tus opp

Daut besondere doaraun: Jieda Senja en jieda Musikaunt nauhm daut Leed tus enn sienem Launt opp. Ideejejewa we Eduard Giesbrecht, dee daut Leed em englischen Original (The Blessing) opp englisch jehiet haut en doavon seeha beenndruckt we. Sien Ziel we, Mensche ut dee plautdietsche Welt tooptobrinje. Pedro en Nathalie Dyck ewasade den Songtatjst opp Plautdietsch.
Daut Leed word dann em Studio Exalta Jesus enne Kolonie Menno toopjestalt. Daut Video selfst schneede dann Julio en Regine Jordan ut Bolivien. Auls daut dan opp Youtube unja dem Titel “Exalta – de Säajen” vebreet word, klickte daut fots dusende ute gaunze Welt aun.

Ewa 200 Millioone Klicks em Original

The Blessing heet daut Original. Aul dee eschte Oppnohm enne Elevation Church enn Charlotte, North Carolina, vom 18. Moaz 2020, tjrech fots dree Millioone Klicks opp Youtube, seitdem ess The Blessing vele wiedere Millioone jedeelt worde en haft sich bit enne hinjaschte Wintjel vonne Ed vebreet en haft to vel Nie-Oppnohme jefiet selfst en Lenda soo auls Saudi-Arabien, Iran, Südkorea en Tobago. En opp Plautdietsch.
Mie selfst jefellt dee Versioon vonne Kirche in Pott seeha got – waut uck doaraun licht, daut etj een gooda Kunde von disse Tjoatj sie.
https://youtu.be/SOjDFIRmuC4 / Das Original: https://youtu.be/Zp6aygmvzM4

Horst Martens

Leave a Comment