Dee 2. Plautdietsche Medienkonferenz organisiet dee Kolonie Neuland, Paraguay, vom 30. Moaz bett 2. Aprell 2015. Daut Prograum besteiht ut Veadreaj en Workshops to dee Theemasch Toopoabeit, Medienuttusch, Tatjste vefote, Audio- en Videobiedreaj jestaulte en Foto / Kunst.
Dee Veaunstaultasch lode seeha enn. Aunmalde kaun man sich bitt dem 1. Febawoa unja dissem Lintj: 2pmk.eventbrite.com.
Auss Rednasch stohne bitt nu faust: Dr. Heinrich Siemens, Hans Reimer, Michaela Bergen en Viktor Sawatzki. Jemeensaum welle dee Medienoabeidasch daut Plautdietsche fördere en em Medienbereich enja toopoabeide. Dee Deelnohm ess gratis.
Doa sele Medienoabeidasch von veschiedne mennonitisch-tjristliche Sendasch en Zeitunge kome, von Kommunikationsaufdeelinje von Koloniesunjanehme. Dee 1. Plautdietsche Medienkonferenz we aune 2013 enne Kolonie Frieslaunt. To dee Tiet kaume 48 plautdietsche Medienoabeida toop, unja aunderem Vetreda ut Mexiko (Bibelschool), Kanada (Mennonitische Post, Radio „De Brigj“ und Family Life Network) Bolivien (Radio Trans Mundial), Dietschlaunt (SW-Radio) en Paraguay (Radio Friesland, Radio ZP30, Radio Loma Plata, Radio Mensajero, Asociación Civil Chortitzer Komitee, Mennonitischa Jeschichtsverein, Radio Neulaund etc.).
Em Aunschluss aune Konferenz woat eene fiefdoagje Busreis aunjebode. Aum 6. Aprell jeiht daut loos to dee Mennonitekolonie enn Paraguay en dee Iguazú-Wotafälle.
Aum Friedachowent, dem 10. Aprell, kom wie wada biem Mennonitenheim enn Asunción aun. Daut kost circa 400 US-Dolasch pro Persoon (inkl. Ewanachtinje, eene Hauptmohltiet pro Dach en dee Enntrittspriese).
Reise-Interessiede sele sich bie Heinz Wiebe (Telefon 00 595 971 701 634 oda hwiebe@neuland.com.py) malde. Tom Organisatioonsteam jehiere Michaela Bergen, Viktor Sawatzki en Osvaldo Schapansky. Wea dee 2. PMK finanziell unjastette well en dee Plautdietsche Sproak fördere well, maldt sich bie Osvaldo Schapansky: osvaldo@neuland.com.py.