„Vaspa en Meddachschlop sent vepflichtende mennonitische Institutioone, dee eenen meist relijieusen Charakta aunjenome hawe.“ Daut schrift Jack Thiessen enn sienem Plautdietsch-Wedabok. Daut ess vleicht een bet jnerrich jemeent, oba Molly Wiebe Faber schrift gaunz ernst doarewa. Eah Artitjel enne Tiedschreft Anabaptist World heet „Gloowe jeformt derch Faspa“.
Vaspa – jeseejende Mohltiet
Daut Wot Vaspa ess ejentlich moa dee diretjte Ewasatung vom hohdietschen Wot Vesper. Enne Bediedinj ess Vaspa oba waut aundret auls Vesper: Daut betratjt sich opp eene eefache, oba traditionelle Mohltiet. Dee Desch woat aum loten Nohmeddach en meschtens Sinndach jedatjt. Disse Mohltiet besteiht typischawies ut Tweeback, Botta, Wrenj, jeschnednen Tjees, koldem Schintjefleesch, Worscht en ennjelajde Gurtje. Fere Familje en fe Frind ess daut eene Jelejenheit, tooptokome en eene jeseejende Mohltiet to jeneete. Enn Nodamerika schient sich em Ewajen dee Schriewwies „Faspa“ derchjesat to hawe.
Toopkome es wichtja auls saut woare
Molly Wiebe Faber, eene eejemolje Schauspelarin en vondoagsche Professorin fe Theauta, haft sich deepere Jedanke ewa dee Bediedinj von Vaspa jemoakt. „Faspa (enne nodamerikaunsche Schriewwies) ess eent vonne Dinje, dee etj auls eenen Korn vom mennischen Wajsch identifiziere”, schrifft see enn Anabaptist World. „Faspa twindjt doatoo, em Jeajensautz to dee vondoagsche Hektik, langsama to woare en daut Lewe met den to jeneete, dee aun eahrem Desch sette. Daut jeiht om den Prozess en nich om daut Produkt vom Toopsenne.“ Daut Toopsenne ess wichtja auls daut Sautwoare.
Vaspa bediet: Schlichtheit en Jemeenschauft
Wiebe Faber entdatjt en dee Tweschen-Mohltiet eene mennonitische Ejenschauft: „Faspa ess daut kulinarische Equivalent to eenje mennonitische Ejenschaufte, dee etj enn miene Tjindheit jeleht haw: Schlichtheit en Jemeenschauft.” Faspa oder Vaspa tjene ons enn disse stressje Tiet wiese, “woo wie langsama woare en een Lewe fehre tjene, daut dem dichta tjemmt, waut Gott fe ons em Senn haft”.
Molly Wiebe Faber ess Assistenzprofessorin fe Theauta aum Northwestern College enn Orange City, Iowa. Toescht oabeid see auls Schauspelarin en Schauspellehrarin enn Denver, Colorado.
En neachsta Tiet erschient hia een Artitjel ewa Meddachschlop.
Siehe auch: Am Anfang ist der Freier – die plautdietsche „Tjast“ – Menno-Welt / Tweschen Friee en Befriee – Plautdietsch-Freunde e. V.