Fotos tom wiedaklicke: Ewa dissem Tatjst send ewa 30 Fotos to seene. Rajchtsch unje aum Foto send Pfeile, met dee jie wiedaklicke tjene.
Dee Aula vonne AHF-Hauptschool enn Detmold es ziemlich groot, oba fe dee vele Mensche, dee tom Kultuaowend kaume, we to weinich Plautz. Dee Veaunstalta organisiede schwind goot hundat Steehla, dee enne Waundelhalle oppjestallt worde. Ewa eenen Monitor kunne se den Owend vefolje.
Daut Gaunze we aus Finale vonne Plautdietsche Medienkonferenz jedocht, dee ditt Joah enn Detmold staudtfung. Doamet dee Medienmensche ut aundre Lenda seehne en hiere kunne, waut dee Plautdietsche aun Kultua en Dietschlaund produziere. Radio Segenswelle organisied den Owend.
Viktor Sawatzki, Chef vonne Medienkonferenz en von Radio Segenswelle, moderied daut Programm toop met Hermann Schirmacher von Radio HCJB, dee fe Johann Penner ennsprung. Utjeschmitjt met lostje Anekdote, präsentiede see dee Tjinstla, dee sich enne plautdietsche Szene enn Dietschlaund eenen Nohme jemoakt hawe – dee meschte uck bastens bekaunt derch eahre Toopoabeit met dee Plautdietsch-Frind: Andreas Dück met siene Band sung „Bliew Plautdietsch, bliew Mensch“ en aundre Leeda, Ella Deppe en Katharina Fast droge plautdietsche Romanze vea, Peter Martens en Elisabeth Zacharias sede Jedichta opp oda vetallde Jeschichte. Dee Schauspela Peter Warkentin leid eene Theautagrupp bie dee Medienkonferenz en haud met dee Kursdeelnehma Szenen ennstudiet, unja aundrem met Beate Penner, Katharin Jabs en Tatjana Klassner. Peter Wiens stalld dee Deelnehma von sienem Schriew-Workshop vea. Dee Klassik-Schien bedeend dee Tenor Peter Friesen. Modernere Leeda mit Tatjste von Peter Wiens droch Peter Penner toop met siene Jitoa vea.
Oba dee jratste Attraktion we woll dee Famielje-Band „Dee Friesens“ ut Nod-Amerika. Twee Ellere met Meatje en Jung droge plautdietsche Leeda ve, dee opp populäre Voltjsmusik-Wiese ut Nodamerika jrinde.
Dee Ewaschreft to dissem Artitjel betratjt sich opp dee Faststallung von Herrmann Schirmacher, daut en Klompe Tjinstla met dem Veanohme Peuta (Peter) aum Progrmm metwirtjde – unja aundrem were daut Peter Friesen, Peter Warkentin, Peter Braun, Peter Martens en Peter Wiens. Waut nich präsent we: Dee junge Generation – em Publikum were vel jinjere Mensche uttomoake, oppe Biehn weinja.
