Dee dietschsproakje Medien hawe em Oktoba doatoo oppjeroope, sich fe dee weltwiete Wohl aus „Auslandsdeutsche des Jahres“ to bewoawe. Aum Enj konkurriede diee plautdietsche Michaela Bergen ut Paraguay, eene Dietschbrasiliaunarin, eene Dietschaustraliarin en eene Ungarndietsche. Nu es kloa: Jewonne haft dee Ungarndietsche Viktória Nagy. See tjrej rund 60 Prozent von 8.600 aufjejewde Stemme.
Daut jintj nich om Scheenheit, sondarn om daut Engagement von Frues. Plautdietsch FRIND fung daut goot, daut eene Plautdietsch soo vel Selfstvetrue haud. Dee Wettbewerb saul wadaholt woare – dann motte noch meeja Plautdietsche deelnehme.
+++++
Artitjel utem Archiv vom 8. Dezemba 2017
Daut kaun senne, daut demnechst eene Plautdietsche „Auslandsdeutsche des Jahres“ woat. Enne enjere Wohl es Michaela Bergen ute mennische Kolonie Friesland enn Paraguay.
Jrindarin vonne Plautdietsche Medienkonferenz
Mensche, dee opp eene vonne Plautdietsche Medienkonferenze were, tjanne Michaela Bergen, wiels see met Viktor Sawatzki toop disse Veaunstaultinj jejrindt haft. Dee 38-Joahsche ess met dree wiedere Kandidatinne vonne Internationale Medienhilfe (IHM) – eenem Natwoatj von dietsche Utlauntsmedien – fe den Titel nominiet worde. Enn Friesland oabeit Michaela enne Redaktion „Friesland Informationsblatt“, enn see sat sich seeja fere plautdietsche Sproak enn. „Etj wud mie seeja freie, wann etj dee Wohl aus ‚Auslandsdeutsche des Jahres“ jewenne wud, wiels daut seeja goode Werbung fe dee plautdietsche Sproak we“, sed Bergen. Dee Jury haft Michaela ut 20 Kandidatinne fe dee latzte Utwohlrund utjewehlt.
Jinjere Frues beloohne
Dee Wettbewerb saul dee jinjere Frues ut dee dietsche Jemeenschafte en Mindaheite oppe gaunze Welt fe eahre Aktivitete beloohne, saje dee Organisatore. Butadem saul oppe kulturelle Leistunge von Utlauntsdietsche oppmoatjsam jemoakt woare.
Wea jewennt, saul aum 15. Dezamba bekaunt jemoakt woare. bit Sinndach, 10. Dezamba, kaun oppe gaunze Welt per E-Mail an info@imh-service.de aufjestemmt woare.
