Aule twee Joah stohne Veastaundswohle aun, en dee were aune 2017 wada falich. Ewa daut Resultat es enne Druck-Utgow vonn Plautdietsch FRIND nohtolese. Oba uck hia online informie wie doarewa.
Horst Martens well nichh meeha Stalvetreda senne, wiels hee meent, daut dee Stalvetreda enn Detmold oda Omjewinj wohne sull, om sich diretjt oppe Sted fe dee Vereensbelange enntosate, daut we fe ahm nich meajlich, wiels hee enn Herne wohnt. Siene Sted auls Stalvetreda nemmt Peter Wiens enn, dee Jrinda vonne Plautdietsch Frind. Dee Veastaunt bejreesst uck twee niee Jesechta: Andreas Friesen woat sich fe Sozialet ennsate, Kornelius Ens, dee niea Chef vom russlauntdietschen Museum, woat dee Vebinjinj tweschen Vereen en Museum pfleaje. Wie bejreesse dee Niee en saje: Jie sent von Hoate wellkome!
Dee niea Veastaunt word met eene Stemmenthaltung jewehlt: 1. Veasetta: Heinrich Siemens, Stalvetreda: Peter Wiens, Kassiererin: Anne Wiens.
Dee erwiedada Veastaunt word eenstemmich jewehlt en besteiht ut disse Persoone: Agnes Gossen (Schwoapunkt: Literatur), Horst Martens (FRIND), Andreas Friesen (Soziales), Kornelius Ens (Museum), Eduard Thun (Kontakte to dee School), Viktor Sawatzki (Radio), Tatjana Klassner (Kultua). – Aus Kaussepriefasch worde Rita Kröker en Maria Enns jewehlt.
Neajchste Plautdietsch-Doaginj enn Bielefeld
Dee neajchste Plautdietsch-Doaginj aune 2018 saul enn Bielefeld stautfinje. Plautdietsch Frind well opp disse Oat noch aundre Persoone erretje en opp sich oppmoatjsaum moake.