Nohfedme – daut plautdietsche Spell
Archiv-Update; Plautdietsch FRIND Dezember 2013
Nohfedme bediet, mette Notel hinja eene Noht hea to fedme. Bie ons Plautdietsche haft daut noch eene gaunz aundre Bediedung. „Nohfedme“ tjemmt opp jiedren Faull to Aunwendung, wann twee Menniste toopsette, aulso vleicht een App enn een Panna. Dann fange dee lotestens noh tien Minute aun, uttofinje, opp se nich jemeensaumet Frindschaft hawe. Meistens mett Erfolch: Lotestens noh 20 Minute stalle see faust, daut se Cousins tweeden dredden oda tienden Grods send. Wau tuck tjeen Wunda ess. Oppe Homepage von Willi Vogt steiht: „Aule Menniste send metteenaunda Frindschaft.“ Wann uck dee Linie unjascheedlich auf send. „Mennonite Game“ nanne dee Kanadja enn Aumerikauna dissen Tiedvedfrief – daut mennische Spell.
We sich oppe Spure von siene Vefoahre moakt, haft vel Mejlichtjeite. Wanna daut systematisch en jrindlich moake well, jeiht dau am eefachsten mett „Grandma“. Maun tjafft sich eenen Togaung to „Grandma Online“ (www.grandmaonline.org), eene mennische Ohneforschung, oda to MyHeritage, een internationalet Portal, en jefft dann sienen Nome enn. Wann du Heinrich Derksen heetst, ducke onszefea 500 Heinrichs Derksen opp. Mett dee Enngow vom Jeburtsdotum best aul so goot auls aum Ziel. En mett dem Jeburtsort weet maun dann: Daut jefft moa eenen Heinrich Derksen, dee aum 11.9.1850 enn Neuendorf jebohre ess. Wea siene Nohme enn „Grandma“ jefunge haft, kaun sich jletjlich schatze – wirschienlich kauna dann seine Vefoahre bett dem 17. Joahundat tridj vefolje.
En Dietschlaunt bedrifft Willi Vogt († 2021) mennische Ohneforschung. Siene Homepage heet: http://chortiza.heimat.eu/. Vogt haft Liste von ewa 160.000 Nomes jesaummelt, butadem Darpsplons, Fotos, Betj, Lewensläufe, Doagbetja, Koate. Siene Informatione betratje sich aula oppe mennische Siedlunge enn Russlaunt, oba von doa staume uck aule Plautdietsche auf.
Willi Vogt ess 1958 enn Karaganda, Kasachstan, jebohre. Nohm Physik-Studium wohn denn oabeid he enn Tekeli, Taldy-Kurgan. Seit 1992 essa enn Dietschlaunt, woo he aus Schlossa oabeit. „Dee mennische Jeschicht en Ohneforschung ess mien Hobby, daut etj 2000 entdatjt haw. Mine Vefoahre staumme aula ut Chortiza, kloa, daut etj mie enn easchta Linie mett disse Kolonie befoot. Mette Tied fangt man oba aun, ewa den Tallaraund to tjitje.“
Vogt sachjt, Grandma ess dee wichtichste Tjwall fe Menniste. „Nehm wie mol aun, enn eenem Fimilje-Book kaun maun 3.000 Persone erfote. Dann bruckt man, om aule Persone vonne Grandma to veöffentliche, onsjefea 400 Betja.“ Auladinjs woat maun ennjejrenzt, man kaun emma moa weinje Linie metteenaunda vejlitje. „Enne Grandma send sotosaje aule disse Betja benne. Man kaun sich enne Dotebentj frie beweje – ne bowe, dwee, noh unje.“
Uck ewa dee internationale Portale soo auls MyHeritage kaun maun sien Frindschaft nohfedme. Doa kaun maun sogoa eenen DNA-Test moake en daut Ergebnis met Millioone von aundre Tests vejlitje. Ess oba diera.
Vogt haft mol enn eenem aundren Programm dee Funktion „Aule Vewaundte utwähle“ jedretjt. Daut Programm socht eene Stunde. Daut Resultat: 894.740 Persone von 941.465 (damols „Grandma 5“), aulso 95 Prozent, weare mett ahm Frindschaft. „Oba etj wisst uck, woo vel Vebinjunge noch fehle“, sachjt Vogt. „Mien Fazit ess: „Aule Russlauntmenniste send Frindschaft, en daut woahrschienlich mehafach.“
Info-Box
GRANDMA („Genealogical Registry and Database of Mennonite Ancestry“) ess dee wichtichste Tjwall fe aule Menniste, waut sich fe Ohneforschung ineressiere. Dee Online-Version tjricht maun fe 20 Dolla fe twee Joah. www.grandmaonline.org
Das GRANDMA-Projatjt woad organisiet von eenem Komitee unja dem Dack vonne „California Mennonite Historical Society“ in Fresno, Kalifornien, USA.
Informatione aun: Kevin Enns-Rempel (Email: kennsrem@fresno.edu) Postalisch: „USA, California Mennonite Historical Society, 1717 S. Chestnut Avenue, Fresno CA 93702“.
