„Ons Menniste fehlt daut Interesse fe Jeschicht“

Utem Archiv: Interview mett Willi Vogt ewa siene oppwendje Homepage

Ver Kortem ess Willi Vogt jestorwe, dee daut groote Internet-Archiv fe russlauntdietsche Menniste oppjebut haft (met dee Halp von aundre). Mie ess nu escht oppjefolle, daut dee „Plautdietsch FRIND “ mol een Interview met Willi Vogt tom Theema „Nohfedme“ fied (Plaudietsch FRIND Nr. 28, 2014). Daut Interview publizie etj nu tom eschtenmol oppe Homepage. Uck dee aundre Artitjel tom Theema „Nohfedme“ woa etj noch em Internet nennstale. Dee Sied heet https://chort.square7.ch/FB/D0617.html.

Serie „Nohfedme“, Deel 1 (Archiv Plautdietsch FRIND, Nr. 28, 2014).

FRIND: Woo send See doatoo jekohme, eene so oppwendje Homepage to bedriewe?

Willi Vogt: Etj sie enn Russlaunt enn eenem Darp oppjewosse, woo moa weinich Plautdietsche were, dee vespotte mie fe onse Sproak. Auls etj 42 Joah oold we, dwung miene Oma mie praktisch, waut ewa miene Vefoahre to lese – en seitdem sie etj doabie.

Butadem we dee Cousin von miene Oma, David Rempel, Professor enne USA, en he haft enne 60-ja Joahre daut easchte Archiv von Russlaunt noh Nod-Amerika jebrocht, daut ess daut soojenannde David-Rempel-Archiv. En ea Onkel Kornelius Hildebrandt we Fibritjbesetta enn Chortiza, dee haud enne 1880-ja Joahre woahrschienlich daut jratste Fimilje-Archiv unja dee Menniste enn Russlaunt. Doarut word daut Bok von seinem Opa (en mienen Veafohre) Peter Hildebrand: „Erste Auswanderung der Mennoniten …“ 1888 jedruckt. En David Epp schreef noh Dokumente ut dissem Archiv 1889 daut Bok „Dee Chortizer Mennoniten“. Deswejens sie etj unja mien Frindschaft nich dee easchta, dee sich fe onse Jeschicht interessiet.“

FRIND: Woovel Tied investie Jie jiedren Dach fe dee Familjeforschung?

Vogt: Etj wud saje, nich vel, oba miene Frau meent: Vel to vel, he sett je moa noch verrem PC.

FRIND: Woovel Mensche malde sich bie junt?

Vogt: Onsjefea 51 Besetjasch send jiedren Dach opp miene Homepage. Enne easchte Joahre 2003-2003 weare dee meschte Besetjasch ut Nod-Amerika. Vondoag send de meschte ut Dietschlaunt, dann kome Nod-Amerika, Russlaunt, Süd-Amerika. Manchmol kome oba uck gaunz „exotische“ Maldunge, tom Biespell ut Australien oda Kenia. 

FRIND: Woont send june Pläne? Waut fe Ziel vefolje Jie?

Vogt: Vonne Mennoniten en Nod-Amerika worde seit 1990 mehrere hundatdusend Archivdokumente ut Russlaunt opp Mikrofilme oppjenohme. Oba dee Nodamerikauna hawe een Problem, see tjeene disse Dokumente, dee opp dietsch en russisch vefoot send, nich lese, wiels kaum jemaund disse Sproake beharrscht. Wie enn Dietschlaunt beherrsche disse Sproake, oba ons fehlt daut Interesse aun onse Jeschicht. Deswejens ess ons Ziel, ditt Interesse een bestje to watje en notowiese, daut wie stolt opp onse Vefoahre enn Russlaunt senne tjene.

Daut Interview fied Horst Martens