Von aunjespunjde Rebuse
Arbus (Rebus, Herbus) – daut Wot kaum toop met dee Wotameloon ute Türkei noh Russlaunt. Opp Türkisch heet dee Wotameloon Karpuz. Daut steiht soo em Plautdietschen Wedabok von Jack Thiessen.
Bie ons em Chaco enne Kolonie Nielaunt hat Taunte Auna Reimasche (Nohme je-endat) emma to-escht Rebuse. Meschtens were dee uck seeha groot en seeha root. Dan foh see met dem Bogga derchem Darp en vekofft eahre tiedje Arnte. Twee Weatj lota word see aul nuscht loos, wiels dee aundre eahre Rebuse dan uck riep were. Wer zuerst mahlt …
Onkel Auna Reima
Wiels dee Frau soo cleva we, word dee gaunze Familje „Auna Reimasch“ jenant. Sogoa dee Maun heet dan soo, Onkel Auna Reima, waut woll en bet jemeen we. Oba dee Plautdietsche nane aundaschrom Frues uck noh eahre Mana. Miene Frun tjrech tom Biespell eenen Breef, dee we aun Frau Horst Martens adressiet. Oba daut haft met Rebuse nuscht meeha to doone.
Tridj nohm Theema – nuh met dem Unjatitel: Rebuse aunspunje.
Miene Frau Süstje eahre Kusine oda Nicht Peetasch Marie jelld bie eahre Familje eenen Somma lang auls Rebuse-Expertin. Jiedes Mol, wan see oppem Fletj jintj, om eene Rebus to Meddach oda to Unkost to hole, kaum see tridj met eene butajeweenlich schmackhaufte Meloon. Deweajens word see uck emma jeschetjt. Oba eenes Doages we daut to enj met dem Rebuse-Schlaraffenlaunt. Auls dee Pa mol oppem Fletj tjitje jintj, waut doa loos we, sach hee daut aule ewa jeblewne Rebuse ful were. Auls hee noch noda tjitj, moatjt hee, daut aule Rebuse aunjespunjt were. Siene Dochta haud aulso jiedesmol soo lang jespunjt, bet see eene riepe Meloon fung – aulso een Biet rutjeschnede, om to titje, opp daut Fruchtfleesch aul root jenoch we. Na jo, en dee Aunjespunjde (Auspunje = ein Stück in Form eines Dreiecks rausschneiden) dee kunn man dan vejete.
Miene Froag ess: Kunne dee Rebuse uck nohriepe, wan see aul aunjespunjt were?
Woo etj opp ditt Theema kaum? Etj plon vondoag en mienem Goade enn Herne, Dietschlaunt, Rebuse-Tjena to sate (Foto). Woare dee oppgohne en Frichte droage?
Horst Martens