Dee eschta plautdietscha Bundesligaspela

Eduard Löwen em Trikot vom FC Augsburg. ©Eduard Löwen.

Dee Herthana Eduard Löwen besteticht em FRIND-Jesprech sienen kulturellen Hinjagrunt

Sinnowent, noh Klock sass zeowend irjendwann enne Joahre 2018/2019. Enne Sportschau rant een Berecht ewa een Spell vom FC Nürnberg. Dee Reporter sajcht: „Die Nürnberger greifen an, Löwen spielt den Ball weiter an … “. Etj docht: Waut? Haft dee Löwen jesajcht? Dan googeld etj dee Maun­schauft­­oppstalinj von Nürnberg en sach: Dee Spela heet wertjlich Eduard Löwen. En: Hee ess een Plautdietscha.

Em Somma 2019 watjseld Löwen vom Tweedligisten Nürnberg noh Berlin. Hee haud eene seeha goode Saison jespelt en hopt, daut hee sich enne 1. Bundesliga etabliere kunn. Oba daut kaum aundasch. Hee we velatzt, mok moa sewen Spells enne Hanrund. En dann kaum Klinsmann.

Proobleeme unja Klinsmann

Anfang Jaunua 2020, Hertha BSC Berlin trainiet enn Florida, USA. Uck Eduard Löwen ess doabie en strenjt sich aun. Jürgen Klinsmann ess dee niea Traina vom Bundesligavereen. Vom eejemoljen Nationalcoach woare Wunda erwenscht. Oba dann jefft Hertha noch enn Florida bekaunt, daut Eduard Löwen auleen noh Dietschlaunt tridj flicht, om sich eenen nieen Vereen to setje. Klinsmann sach ahm moa auls Utwatjsel-Spela. Nich daut eensje, woomet Klinsmann sich vedeed.

Sinnowend, 23. Mai, 2020. Augsburg spelt enn Schalke. Enne 6. Minut woat Khedira dich biem Schalka Strofruhm jefoult. Eduard Löwen lajcht sich den Baul trajcht, rannt aun en schitt dee Kugel ewa aule Spelasch rewa diretjt lintjsch enne Dooa-Atj. Dee Dooawoat von Schalke, Markus Schubert, stratjt sich vejeblich, dee Baul schloch met vel Schnett enn. Daut we Eduard sein Premierendooa. Augsburg jewonn 3:0.

Eena von ons

Wie weete: Eduard Löwen (dee Plaut­­diet­­sche saje Leewe) ess een Veanome en een Famieljenome, dee unja Plautdietsche foaken veatjemmt. Oba daut sent uck normale dietsche Nomes. Aulsoo tjitj etj bie Wikipedia noh. Doa steiht: Eduard Löwen ess een „dietscha Footbaulspela met rusche Wartle“. Dee Jewessheit wausst: Daut mott eena von ons senne. Dan froag etj mienen Bekaunden Eduard Thun, dee vel Kontakte too Russlauntdietsche haft: „Jo, dee Eduard Löwen staumt von Menniste auf en haft nu uck noch eene Mennische jefriet.“

23 Joah oolt, oba aul vel erretjt

Eduard Löwen, noch em Hertha-Trikot. © Wikimedia Österreich, Steindy

Sewen Millioon Euro hawe dee Berlina ver eenem Joah fe den Meddelfletjspela betohlt, hee we eena vonne diesch­te Spelasch vonne tweede Bun­des­liga. Enn siene korte Karriere haft dee 23-joahscha aul eenjet erretjt.

„Met mienen Pa red etj Plautdietsch“

Jebore word hee aum 28. Januar 1998 enn Idar-Oberstein. Siene Ellre we­re kort ver siene Jeburt ut Sibirien ennjewaundat. „Miene twee Jeschwista sent uck dort (enn Sibirien) jebore“, vetahlt Löwen dem Plautdietsch FRIND. En hee redt uck onse Sproak: „Met mienem Pa red etj Plautdietsch.” Butadem haft hee eene aundre Je­meen­saumtjeit met vele Menniste: „Etj sie seit veea Joah jleibja Tjrist en folj Jeesus noh.“

Tjeen Alkohool en tjeene Tattoos

Daut sajcht hee nich moa dem FRIND, uck jeajenewa aundre Medien helt hee doamet nich hinjrem Boajch. Enn eenem Youtube-Film (Kickbox), betoont hee, nohdem dee Reporta frajcht, woarom hee Jeesus fe siene Karriere dankt: „Wiels etj ahm aules to vedanke haw: Mien Lewe, miene Ellre, miene Famielje, mien Talent. Aules, waut etj haw, jehieat ahm.“ Aus sienen Lieblings-Bibelspruch jefft hee aun: „Reema 8 Varsch 34: Wan Gott fe ons ess, wea kaun jeajen ons senne?“

Hee drintjt tjeenen Alkohool, soo aus maun lest, en kaun Tattoos nich met sienem Gloowe veeenboare. Dee Berliner Zeitung meent damols to siene Enthaltsamkeit: „Dee Berlina Partyszene woat Löwen demnach kaum interessiere.“

Veteidja, Meddelfletjspela, Stirma

Plautdietsche Bundesligaspelasch tjant hee tjeene: „Etj tjan moa Tjriste, dee Bundesligaspelasch sent.“ Footbaul spelt hee, seitdem hee fief Joah oolt ess: „Daut haft mie emma vel Spoß jemoakt, en daut we emma mien Droom, Footbaulprofi to woare. Dem Harrn sie dank, sie etj daut vondoag.“ Aune 2018 we Löwen eena vonne wichtichste Faktore fe den Opp­stiech von Nürnberg. Sien bastet Spell mok Löwen, soo aus hee dem FRIND sed, aus Nürnberger Spela jeajen Duisburg aune 2017 enne 2. Bundesliga. „Enn dem Spell haw etj enne eschte Haulftiet Bennaveteidja jespelt, enne tweede Haulftiet Stirma, woo etj dan miene eschte beid Dooasch enne 2. Bundesliga jeschote haw.“ Dee „Bild“ gauf ahm dee Noot 1. Doaraun ertjant maun, woo velsiedich Eduard ess: Dee 1,88-Meeta-Maun haft auls Bennaveteidja, Sassa, Spelmoaka en soogoa auls Stirma jespelt.

Löwen we neajen Spells Jugendnationalspela

Dee Nürnberga Trainer Michael Köll­ner entdatjd ahm enne vede Liga biem FC Saarbrücken. „Löwen ess een absoluta Vollprofi. Hee fokussieat sich moa opp Footbaul“, sed hee too dee BZ, „aules aundre ess ahm eendoont.” Eduard Löwen jehiead too dee baste Jugendspelasch. Soo haft hee mehrere Mol daut Trikot mettem Bundesodla ewajestreept. Tweemol haft hee enne U-20, sewenmol fe dee U-21 (unja Stefan Kuntz) jespelt, daut latzte Spell we noch em Moaz jeajen Enjlaunt (1:2 jewonne). Oba nu ess hee ute Jugendschooh rutjewosse.

Miene Fru leewd Jeesus

Ver kortem haft Löwen eene Fa­miel­je jejrindt, enndem hee siene Ilona je­friet haft. Too dee FRIND sajcht hee: „Daut we mie opp jieden Faul seeha wichtich, daut miene Fru denselwjen kulturellen Hinjagrunt haft en natürlich aun eschta Sted Jeesus von Hoate leewt soo aus uck eahre Famielje. Gott sie dank haw etj mie met soone Fru befriet.“

Eduard Löwen opp siene Tjast met siene Brut Ilona. ©Priwaut

Aulet Goode

Nu wacht wie doaropp, daut Eduard Löwen noch meeha soon Spells moakt. En doaropp, daut hee irjentwan daut Nationalspsela-Trikoot drajcht. Dee FRIND wenscht dem eschten plautdietschen Bundesligaspela aulet Goode!

Horst Martens

Leave a Comment