Tom Aunfang vonne Sommaferien mot dee niee FRIND rutkome – dit Prinzip well wie uck ditmol opprecht hole. Aulso: Enne neachste Doag tjrieje aule Abonennte daut druckfresche Exemploa.
„Twee plautdietsche Junges em plautdietschen Launt“ – soo heet dee Hauptjeschicht. Wie beschriewe daut Bok von Tim Tichatzki : „Roter Herbst in Chortitza“. Wie tjane dee Jeschichte en dee Jeschicht meist utwandich: Woo onse Grootellre unjre Machnowze liede deede, woo see unja Lenin aun Hunga to Grund jinje, woo see von Stalin en siene Jeheempolizei Tscheka terrorisieat worde. Dee Jeschicht haft nu Tim Tichatzki enn eenen biografischen Romaun kristallisieat. „Roter Herbst enn Chortiza“ ess em Brunnen-Verlag rutjekome. Wichtich es uck daut Interview, daut dee FRIND met Tichatzki fiehd: Woo tjemmt eena ohne plautdietschen Hinjagrund doatoo, soo een Bok to schriewe? Disse en aundre Froage stalld etj ahm.
Vom Katholitjedach enn Münster
Vom Katholitjedach enn Münster berecht wie met eenem langen Artitjel. Wie aus Menniste hawe von onse Ellere jelieht auftoprachere. Dee kathoolische Tjoatj deiht sich oba schwoa doamet, aundre fe eahre vel Vebretjes om Vezeihung to bedde. Nu haft daut jeklaupt – met mennischa Halp. Dee Menniste prachade auf, dee Evangelische prachade auf en tom Schluss uck dee Katholitje.
Expertinne fe Nadadietsch
Heinrich Siemens haft met dree Mensche jeredt, dee fe Plautdietsch en Nadadietsch tostendich send oda bie dee Rejierung sich om Omsiedlafroage tjemmere.
Dann haw wie noch eene Reisejeschicht ewa Ekuador, lote ons berechte, waut dee Reajen em Chaco aunrecht en stalle een poa Betja vea. Sport deff nich fehle. Oba daut es noch lenjst nicht aules. Tjitjt en lest selfst.