Aum neachsten Katholitjedach enn Münster (9. – 13. Mai) nehme uck Menniste deel. Unja dem Theema „Suche Frieden“ jeiht daut offiziell om Fred en Unjaeenaunda-Vedroage. Oba daut sitt uck een bestje doanoh ut, daut wada ewa dee Menniste jerecht woare saul.
Daut komplette Programm: hia klicke!
Dee Mennonitische Weltkonferenz steiht seit 1998 met dem Vatikan em Dialog. Insider vetalle, daut aul vel Papiea beschrewe word mett dem Ziel, daut sich dee kathoolische Tjoatj fe dee schratjliche Ermordung von 5.000 Täufa entschuldje well – oba daut Wot „Entschuldjung“ es opp disse hundate Sied nich veajekome.
Katholitje finje Vefoljung rechtich
Enn Münster jeiht daut nich om dee Vefoljung vonne Täufa derch dee Kathoole, sondern om dee Jewaultherrschaft vonne Täufa om Jan Matthis en Jan von Leyden. Aulso: Be-udeult woare en eschta Linie nich dusendfacha Horror-Folta en Mord von Täufa, sondern daut Faulsche, waut dee Täufa deede. Katholitje en Evangelische send emma noch dee Meeninj: „Daut es rechtich, daut wie dusendfach Rache nauhme.“ Obwohl aul Menno Simons 1536 jeejen dee Täufa ut Münsta red en schreef.
Jebet jejne schlajchte Täufa
En eene Podiumsdiskussion mett dem Theema „Gespräch unja Täufakäfige“ (Friedach, Klock 11) saul daut eene historische Ennfiehrung jewe. Maun well sich met dee Froag beschaftje, woo daut historische Trauma jeheelt woare kaun. Enn eenem Jebetsdeel kaun man sich uck noch ewa dee schlajchte Täufe bekloage.
Katholitje en Menniste biem Meddachsjebet
Dee jratste Driestichtjeit send dee Käfige, dee aune Lambertitjoatj henje: Daut es eene Aunkloag jeajen Täufa en ehnliche Tjoatje. Daut eschte Mol seit dem 16. Joahhundat bede nu Katholitje, Lutherana en Mennonite enn St. Lamberti (Meddachsjebet, Friedach, Klock 13). Maun kaun sich lebhaft veastalle, waut fe Vejlitje doa heajestallt woare. Doa woare de Täufa wada mett Salafiste, muslimische Moslems enn schratjliche Sekte enn eenen Topp jeschehte.
Mennische Experte doabie
Dee mennische Theologin Andrea Lange woat aun aule dree Veaunstaltunge metwirtje, see we Delegiede biem Dialog met dem Vatikan. Met Ralf Klötzer, den wie aus seeja kundjen en neutralen Staudtfiehra tjanne jelieht hawe, und Hubertus Lutterbach send zwei renommiede Fachhistoriker doabie. Wolfgang Krauß ut Augsburg moderiet dee Podiumsdiskussion. Hee es uck deejansja, dee dee Deelnohm vonne Menniste organisiet haft. Wie wensche aule mennische Intellektuelle, dee en Münster fe onse Sach striede, daut see sich goot „schlohne“ (natürlich pazifistisch) en nich eene Minut lang enne Vesuchung kome, daut Büßajewaund auntotratje, daut dee Katholitje fe ahn jeneiht hawe.
Biem Meddachsjebet nehme dee Menniste Andrea Lange, Jacob Schiere ut Hollaunt en Keith W. Blank ut Lancaster/USA, deel.
Daut Meddachsjebet enn St. Lamberti en dee Zentrala Ökumenischa Gottesdeenst em Dom send frie toojenjlich. Fe dee Podiumsdiskussion bruckt maun eene Dauerkoat oda Doageskoat. Info & Anmeldung: www.katholikentag.de