Dee 14. Aprel 2021 ess een besondera Dach fe Plautdietsch-Spreatja ut aule Welt: Vondoag woat Dr. Jack Thiessen, beriehmda Plautdietsch-Lexikograph, Professor, Autor en Autoritet enn Sache Plautdietsch, 90 Joah oolt. Ut dissem Aunlauss veaunstalte dee Plautdietsch-Freunde ut Dietschlaunt om Klock 11 Manitoba-Tied een Zoom-Meeting, om Thiessen to ehre en to bejletjwensche en uck om Jletjwensch vom Vereen en von dee gaunze Lesaschauft to ewabrinje.
Leida leet dee Technik siene Deelnohm nich too, oba Ernst Braun, lokaler Plautdietsch-Tjana enn Manitoba, deend auls Vemeddla fe daut Jesprech en kunn beid Sied kort per Telefon vebinje. Velaja en Vereens-Veasetta Heinrich Siemens moderied dee Zoom-Sitzung, aun dee ut Dietschlaunt uck Peter Wiens (Vereensjrinda) en Horst Martens (Redaktioonsleita Plautdietsch FRIND) deelnauhme. Aundre ut Paraguay were ennjelodt, kunne oba nich deelnehme. Disse Zoom-Sitzung umfoot Plautdietsch redende Mennoniten (Menniste) ut veeha Kontinente: Peter, dee enn Sibirien jebore word, Heinrich enn Europa, Horst enn Siedamerika en Ernst enn Nodamerika, dee aula daut jlitje Plautdietsch rede, daut Jack Thiessen een Lewe lang erforscht haft en enn siene Rej von publiziede Wedabetja faustjehoole haft.
Uck een Jeschentj: den Arnold-Dyck-Pries
Daut gaunze jintj nich ohne Jeschentj auf: Aul verhea haud Heinrich Siemens dem Jeburtsdachstjind metjedeelt, daut Jack Thiessen vonne Plautdietsch-Freunde den Arnold-Dyck-Pries 2021 fe sien Lewenswoatj tjricht.
Ernest Braun/Redaktioon
