Moakt soo mett auls dee „Utjewaundada Plautdietscha“!!! Oba am basten opp Plautdietsch!
Auls etj ver een poa Joah Metjlied vonne Facebook-Grupp Plautdietsch Freunde word, haud wie 400 Follower. Nu sent doarut ewa 5.000 jeworde!!!! Ewa disse Bedeeljung von junt frei wie ons seeha!!!!
Eene wundaboare Vemehrung!
Enne latzte Tiet haft een groota Boom ennjesat. Vel halpt, wan maun emma wada vesetjt, Biedrej to poste. Eena, dee enne latzte Tiet ve fel Jedrenj jesorcht haft, ess dee „Utjewaundada Plautdietscha“. Dee „Onkel“ post Theemasch, dee vele Plautdietsche interessiere – ver aulem fe Mennonite ut Brasilien. Leida meschtens opp Englisch. Mie wudd jefaule, wana ons meeha opp Plautdietsch metdeele wudde!!! Etj haw uck aul vesocht, met dem Utjewaundaden enn Kontakt to kome, wull ahm uck enne Tietschreft „Plautdietsch FRIND“ veastahle, oba daut klaupt nich. Etj sie dee Meeninj, dee haft dee Plautdietsch-Freunde-Ehrenmedaille vedeent. Leida jefft daut dee nich.
Boold eene niee Utgow vonne Plautdietsch FRIND
Dee Plautdietsch FRIND ess dee Tietschreft, dee enj mette Plautdietsch Freunde vebunge ess. Soo auls uck disse Homepage www.plautdietsch-freunde.de. Emm Grunde woat ditt aules vonne selfsje Mensche bedrewe, dee tom Vereen „Plautdietsch Freunde“ jehiere. Soo moak etj tom Biespell uck dee Tietschreft. Enn onsjefea twee Weatj tjemmt dee niee Utgow vonne „FRIND“ rut. Vleicht jankat junt, dee to lese. Etj schriew en een poa Doag noch waut doatoo.
Moakt noch meeha mett
Bedeelicht junt doch noch meeha bie dee Grupp Plautdietsch Freunde von Facebook. Met Posts, dee irjentwaut met Plautdietsche en Menniste to doone hawe.
Aulet Baste!!!