Dee Aunsiedlung von plautdietsche Mennonite enn Angola, Afrika, schient derchut een Erfolch to senne. Een poa Siedla erwatje en eenem Breef aune Mennonitische Post dissen Enndruck. (Berecht opp Hochdietsch: Mennonitische Ansiedlung in Angola macht Fortschritte (menno-welt.net)
Een Moonat nohm Aunkome word aul jeplaunt
Em August 2023 haud menno-welt.net enn dem Artitjel „Mennoniten wandern nach Angola aus“ berecht, daut sich verescht twee Familjes ut Campeche, Mexiko, enn dem afrikaunschen Launt aunsiedle wulle, aules toop oba sewen Familjes. Benjamin en Bertha Kauenhofen hawe sich nu met eenem Schriewe aune Tiedschreft jemaldt. Daut Projatjt ess Realitet. See jehiere to dee eschte Grupp, dee em Jaunua dort aunkaum. Soo auls wie daut von Plautdietsche tjane, hawe see nich dee Henj enne Schoot jelajcht, sondern aul eenen Moonat lota aunjefonge, Kukuruz, Schauble en Weit auntoplaunte. See haude sich aul em Verut Launtmaschine met Container noh Angola schetje lote. Escht aulset to lot we, moatjte dee Bures, daut dee Boddem Kaultj bruckt. Neachstet Joah woat dann woll dee Arnte beta utfaule.
Grauslaunt enn Woold
Dee Kolonie licht onsjefea sewen km vonne Hauptgauss wajch. Wota hawe see doa jenoch bie dree Tjwalle en eenen Fluss. Dee niee Kolonie, Lavoura Esperanza, licht enne Provinz Lunda Norte gaunz em Nodoste von Angola. 50 km brucke dee Koloniste bette Provinzhauptstaudt Dundo. Daut Jebiet licht onsjefea 900 Meeta ewa dem Meeresspejel aum Fluss Cambanza. Een poa Dusend Hekta send Grauslaunt, oba een Deel ess uck Woold.
Angola haft schienboa tjeene Jesatze jeajen Woold roode
Woorewa plautdietsche Siedla schwind em Konflitjt kome, doafea brucke see hia nich Angst to hawe. „Aundasch auls enn Mexiko jefft daut hia tjeene strenje Wooldroodinjsjesatze“, schriewe dee Kauenhofens. Angola schient ahn uck goot jesonne to senne, wiels aul Vetreda vonne Rejierung to Besuch jekome send. Daut neachste Mol, wan see komme, welle see aul angolanische Produkte, vonne Menniste aunjeplaunt, ete. Finanziell hawe see noch eah Utkome, See send aul unjaweajes opp eahre eschte Reis. Daut jeiht noh Mexiko to dee Tjast von eahrem Sehn. Em August welle se tridj ut Mexiko senne, wiels dan enn Angola dee Reajentiet aunfangt. Dan heetet: Plaunte, plaunte, plaunte!