Oabeitsgruppe Literatua, Video en Theauta

Dee 4. Plautdietsche Medienkonferenz vom 3. bot 6. Septamba enn Detmold organisiet veschiedne Oabeitsgruppe, en dee man sich ewa mennische Kultua informiere en wiedabilde kaun. Wie stalle dee eschte dree vea. Meeja Informationen fe dee Medienkonferenz, Studienreis en Aunmaldinj hia…

Oabeitsgrupp Literatua

Dee Oabeitsgrupp “Literatua” leit Agnes Gossen, jebore 1953 en Podolsk, Jebiet Orenburg, Russlaunt.
Studium bie de Liera-Hochschool en Orenburg en Bibliothekarin-Studium en Naltschik, nohea Lehrarin en friee Journalistin.

Agnes oabeid 25 Joah aus Bibliothekarin enne Uniwersitätsbibliothek enn Bonn. Jrindungsmetjliet en langjoahsche Veasettasche vom Literatua-Tjriess vonne Dietsche ut Russlaunt e.V. en Metjlied vom Dietschen Schreftstalla Verein.

Fe eahre langjoahsche Bemehjunge bie dee Integration von junge russlauntdietsche Schriewasch wort see 2008 met de Vedeensdmeddalj vom Bundesvedeenstorden Dietschlaund utjetieetjent. 2010 tjrieech see fe eah omfangritjet kulturellet Engagement den Russlandietschen Kultuapries vom Launt Baden-Württemberg. See es Schriewasche von tien Betja en Hochdietsch en Rusch. Miere Artitjel send veeffentlicht en Joahbetja en Saummelbenj. Ewasatunge en Dietsch en Rusch. Veeffentlichunge enn Plautdietsch Frind en em Buak “Ut onsem Lewe” (2009) en em Sondaheft “Plautdietsche Wiehnachte” (2014). Twalf Joah leit see de Grupp “Plautdietsch Schriewasch”. Se organisied fe jieda Joah Schriewasch-Seminoare en Lesunge.

De Deelnehma tjene ejne Jedichta oda Kortjeschichte ut dem plautdietschen Auldach, eahre Saummlungen oda Ewasatunge metbrinje. Jeredt woat uck ewa daut Theema “Persoone- Beschriewung”, ewa Jebruck enn Tatjste von Redensoat en Sennspricha, Vejlitje von veschiedne Schriewtechnike rede en Tiet hawe, om dee fots uttoprowen. Uck dee Schriewwies von Plautdietsch es een Theema.

Meeja Informationen fe de Medienkonferenz, Studienreis en Aunmaldinj hia…
Deelnom bloos met Aunmaldinj!

Oabeitsgrupp TV/Video/Fotografie

Mien Nohme es Kenneth Giesbrecht en etj woss op enn Durango, Mexico. Etj fung aun Videos to moaken aus etj twalf Joah oolt we un fe de latste veeha Joah haw etj doa volltiedich met jeschauft. Etj haw vel Werbunge fe Jeschafta, Tjast-Filme, Musikvideos en un velet meeha jemoakt. Jejenwotich sie etj dee Medien-Missioons-Leita bie dee Lebenswasser-Tjoatj en Cuahtemoc, Chihuahua, Mexico, woo etj miene Talente brucke kaunn om to halpe, christliche Medien fe Plautdietsch redende Tjoatje to moake.

Medien- Omgang, besondasch Video, existieet seeha weinich enn de Plautdietsch redende Welt, en doaweajen es daut miene Passion, dee Interesse doafeea to vespreeden, aundre to unjarechten en to bejeistre – besondasch fe Video en Photographie. Medien woat dee 1. Wajch sennen, onse tookjinftje Genneratioone to erretje.

En dee Oabetsgrupp woa wie veschiedne Theemasch beoabeide, dee ewa Video en Photographie haundle. Etj woa junt auljemeene un uck fortschrettliche technische Fehichtjeite unjarechte, waut doa to veschiedne Sorte Kameras, Linse, Lichta, Audio en soo wieda, auntowande gonen. Wie hawe uk dee Jelejenheit, om waut wie jelieet hawe, fots auntowande un to eewe.

Ekj kaun meist nich aufwachte, bat etj junt aula seene kaun!

Meeja Informationen fa de Medienkonferenz, Studienreis en Aunmaldinj hia…

Oabetsgrupp Theauta

Peeta Woakjentin liet disse Grupp aun en prooft met de Deelnehma een Theautastekj ut.
Nu aunmalden…

Peeta Woakjentin (60) – jebore en eenem plautdietschen Darp enn Sibirien (Russlaunt).
No de Meddelschool haft hee een Studium enn de Theautahochschool enn Moskau aum Maly Theeauta (1976-1980) jemoackt.
Doanoh Schauspela aum Dietschen Theauta  enn Temirtau, Almaty (Kasachtan). 1995 Omsiedlung noh Dietschlaunt. Metjrinda vom Russlaund-Dietschem Theeauta Niederstetten.
En dee Tiet aus Schauspela haft Peeta Woakjentin mea aus 60 Rolle jestaultet. Buta dee Hauptbeschaftjunk aus Schauspela haft hee uck auls Moderator en Regisseur vele Kultur-Festivals enn Russlaunt enn Dietschlaunt jestaultet.
Von 1998 aun ess Peeta Woakjentin Dozent biem Theeautabund biem Launt Baden-Württemberg. Moakt Regie opp veschiedene Bunen. Hauptpries vom Russlanddietschen Kulturpries vom Launt Baden-Württemberg 2016.
Peeta Woakjentin räd seeja goot Plautdietsch, Hochdietsch en Rusch.

Meeja Informationen fa de Medienkonferenz, Studienreis en Aunmaldinj hia…
Deelnom bloos met Aunmaldinj!

Leave a Comment