Fief Kandidot*inne stohne oppe List fe den Arnold-Dyck-Pries
Ditt Joah saul een Mensch, dee sich fe dee plautdietsche Kultua vedeent jemoakt haft, dem Arnold Dyck Pries 2022 tjrieje. Dee Pries ess wada een Bok biem Tweeback Verlag. Daut latzte Mol haft Elina Penner dem Pries jewonne en daut Bok, daut see dan fe dem Tweeback Verlag jeschrewe haft, ess Tjinjafroage (tjitj oppe Sied 15).
Noch bitt Meddwetj, 10. August tjen jie june Stemm aufjewe. Ditt ess dee Internett-Adrass tom Aufstemme:
https://docs.google.com/forms/d/e/1FAIpQLScDkVQq7T51swrh3sVWLcXjHOFJHU0JlHNOcvG-ERQxz3UZQA/viewform
Wea dee meschte Stemm tjricht, jewennt!!! Aulso: Redt jun Frintschaft, june Frind en Bekaunde aun, daut see aufstemme.
Jewenna-Ehrung: Sinnowend, 24. Septamba, 18 Uhr, Forum, August-Hermann-Franke-Schule, Georgstraße 24, Detmold
Ewa disse fief Persoone, dee oppe korte List stohne, tjen jie ditt Joah aufstemme:
Marcela Enns (Bloggerin Dietsche Mejal, Mexiko)
Etj heet Marcela Enns, oba beta bekaunt sie etj aus dee „Dietsche Mejal“. Etj lew enn Chihuahua, Mexiko, wooa dee meschte Menniste lewe. Daut moakt mie Spos, Nieet ewa mienen mennischen en plautdietschen Hinjagrunt to erfoahre, om online Ennhaulte to erstale.
Mien Ziel ess daut, aule Mensche opp interessaunte Oat ewa Menniste to unjarechte, aum leewsten met plautdietschem Humor.Etj frei mie seeha, een plautdietscha Mensch to senne. Etj lot mie von miene Tauntes en Onkels vetahle, woo see oppjewosse sent, en nu leh etj dee plautdietsche Grammatitj en moak korte Videos, doamet aundre daut uck lehre tjene. (www.youtube.com/watch?v=mLRL-29sSAU)
Lilli Gebhard (Literatua, Dietschlaunt)
Mien Nome ess Lilli Gebhard. Etj sie enn Dietschlaunt jebore, oba russlauntdietsch oppjewosse.
Miene Mutta haft met miene Ooma emma Plautdietsch jeredt en den basten Riebelplatz vonne Welt jebackt. Daut Russlauntdietsch-Mennische proow etj to vestohne en to beschriewe. Etj forsch ewa dee mennische Literatua en schriew selfst Jedichta en Jeschichte. Mie ess daut wichtich, dee Vegohnenheit to vestohne, doamet sich Tookunft entwetjle kaun.
Lore Reimer (Literatua, Dietschlaunt)
Etj staum ut Jnodenfeld ut Kirgisien, daut we een Deel von Leninpol. Dee meschte Mensche rede donn doa Plautdietsch.
Opp eene Tjast von onsem Frindschauft hiea enn Dietschlaunt laus etj mol een plautdietschet Jedicht von mie vea. En nohea froch mie een Gaust – daut we een Hiesja ut Hamburg – von woo etj soo een scheenet Plautdietsch hea haud. Etj vetahld ahm onse Jeschicht. Bit etj sass Joah oolt we, kunn etj blooss Plautdietsch rede, en daut ess fe mie noch emma dee baste Sproak. (https://de.wikipedia.org/wiki/Lore_Reimer)
Andreas Dück (Leedamoaka, Dietschlaunt)
Dee eschte Wed, dee etj hiead, dee eschte Wed, dee etj red en dee eschte Wed, dee etj sung, were aula opp Plautdietsch.
Waut etj seeh, beoobacht, erlew en jleew, dretj etj enn miene plautdietsche Leeda ut. Etj sie emma noch ewarauscht, woo vele Jemieta von miene jesungene Enndretje beweajt woare. Vleicht woare je nich blooss eenije Tweebacktjes bit enne neajchste Jeneratioon ewalewe, oba uck daut eene ooda aundre von miene Leeda ? (www.youtube.com/watch?v=l-bGsteIV2Q).
Radio ZP30 Dee Stemm utem paraguayschen Chaco
Medden em paraguayschen Chaco sendet seit 1975 Radio ZP 30. De tjristlicha Senda, vonne Mennonite strohlt Nohrechte-, Missioons- en Jesallschaftssendunge enn acht Sproake oppe Meddelwall ut – unja aundrem opp Dietsch, Spanisch en opp indigene Idiome.
Oba, en daut ess fe dem Pries wichtich: Uck opp Plautdietsch. Dee Sendunge heete unja aunderem: Toop oppem Wajch, Frues met Hopninj, Plautdietsche Tjinjastund, Waut sajcht dee Bibel. Wea fe Radio ZP 30 aufstemmt, unjastett dee Bemejunge, noch meeha opp Plautdietsch to sende. Tom Biespell plautdietsche Nohrechte.
http://www.zp30.com.py.
Wea aufstemme well
kaun daut ewa Online-Aufstemminj doone. Dee Internet-Adrass, dee jie auntjlicke motte, jew wie ewa onse Homepage (www.plautdietsch-freunde.de) oda Facebook (Plautdietsch Freunde) Enj Juni bekaunt.
Dee Jury, dee disse korte List toopjestalt haft, besteiht utem Vestaunt vonne Plautdietsch-Freunde e. V. (Heinrich Siemens, Peter Wiens, Anne Wiens-Janzen), dem Chefredakteur vonne Plautdietsch FRIND (Horst Martens) en dee Schriewasche Elina Penner.
Dee lange List
ut dee wie dee korte List toopjestalt habe, we:
Heinrich Derksen (Literatua, Dietschlaunt)
Marcela Enns (Bloggerin Dietsche Mejal, Mexiko)
Elisabeth Epp (Literatua, Dietschlaunt)
Katharina Fast (Literatua, Dietschlaunt)
Lilli Gebhard (Literatua, Dietschlaunt)
Agnes Gossen (Literatua, Dietschlaunt)
Paulhans Klassen (Literatua, Paraguay)
Tatjana Klassner (Literatua, Dietschlaunt)
Beate Penner (Literatua, Paraguay)
Katharina Peters (Literatua, Dietschlaunt)
Gerhard Ratzlaff (Literatua, Paraguay)
Lore Reimer (Literatua, Dietschlaunt)
Elisabeth Zacharias (Literatua, Dietschlaunt)
Andreas Dück (Leedamoaka, Dietschlaunt)
Tina Wedel (Musitj, Dietschlaunt)
Heischratje en willa Honnich (Musitj, Kanada)
Justbestbooks Verlag von Rudolf Dück
Radio SW, Viktor Sawatzki
Radio ZP 30
Lilli Gebhard