Johannes Reimer: mennische Parallelwelt woat eare Tjinja veliere

Ommfroag: Dee Kluft tweschen Plautdietsche en Hochdietsche

Tridj tom Hauptartitjel

1. Sennt See uck dee Meeninj en waut hoole See doavon, daut dee hiesje en dee plautdietsche Mennonite meist nuscht nich metteenaunda to doone habe?

Leida ess daut soo en daut ess seeha schod. Jrind doafea jefft daut seeha vele, en disse Tranninj haft nich escht jistre aunjefonge. Daut ess nich bloos een Proobleem vonne russ­launt­diet­sche Menniste. Aul gaunz aum Aunfank trann­de sich dee esch­te Deepa en jrinde eare ejne tjliene Je­meen­des. Enn vele Lenda habe Men­no­nite veschiedne Identiteete. Wie motte bloos aun Nod- oda Sied­ame­rika dentje. En dee russlauntdietsche Menniste habe sich enn meeha aus tiehn veschiedne Gruppe oppjedeelt en betjampfe sich jeajensiedich. Enne Reajel licht daut doaraun, daut see tweschen Gloowe en Gloowensutdretj unjascheedlich uadeele. Soo woat dee jelewde Kultua schwind tom Gloowensennhoolt. En tratjt eena dann enn een aundret Launt, dann schient eenem dee niea Gloo­wens­enn­hoolt leicht soo, aus habe dee hies­je Mennonite dem woahren men­ni­schen Gloo­we verrode. Doaderch entsteiht Jesatzlichtjeit, ver aulem bie vele Russlauntdietsche enn Dietschlaunt. Aundre sate sich vin disse Jesatzlichtjeit auf en praktiziere dann maunchmol radikalen Liberalismus, dee meist ewahaupt tjeene Norme tjannt. Doarunje liede nich weinje vonne hiesje Mennonite.

2. Waut sent dee (historische) Jrind doafea, daut dee beid Gruppe sich uteneen jelewt habe?

Doa ess ver aulem eene Theo­lo­gie, dee Kul­tua en Je­sall­schauft aus fient­li­che und gott­ve­lot­ne Welt sitt. En von dis­se mott maun, soo steiht daut em 1. Jo­han­nes­breef, wajch­ran­ne. Een soo primi­tiva Dua­lis­mus feht to dee Flucht ute Welt, tom beriehmden mennischen Nonkonformismus en doamet uck doatoo, daut eena sich emma wada nie von dee „weltliche Oat“ tranne mott. Jiede jesallschauftliche Aunpaussinj ess vedajchtich, wiels see eenem vom „woahren Mennonitentum“ trannt.

3. Woont sent dee bekaunde Stereotype von dee watjselsiedich aundre Lewensform?

Enne Reajel sent daut ver aulem Kultuaforme, dee Tjleeda, daut jesallschauftliche Lewe, Polititj, Konst esw.

4. Sull wie disse Paralleliteet ewawinde oda sulle aula enn eahrem Biotoop wiedableje (oda vedreje?), ohne daut sich eena omm dem aundren tjemmat?

Maun mott dee ewawinde, wann maun oppe Dua ewalewe well. Eene mennische Parallelwelt woat eeha oda lota eahre Tjinja veliere en missionarisch haft see soo we soo tjeene Derchschlagskrauft. Etj dentj, bloos soolang aus Menniste soone groote Familjes habe, woat ditt Probleem, dee „furor mennoniticus“, soo aus daut dee Historika vonne Mennonite enn Russlaunt, P.M. Friesen, eenmal nannd, bestohne.

5. Habe See perseenlich eeha goode ooda schlajchte Erfoahrinje jemoakt?

Oba jo. Wann etj doarewa rede wull, kunn etj een gaunzet Bok schriewe.

Johannes Reimer es Professor fe Missiologie aune Universität von Südafrika en Dozent fe Missiologie aune Theologische Hochschule Ewersbach.

Leave a Comment